DAVAO DEL NORTE (PIA) – – Mihakot sa dagkong mga award ang Probinsiyal nga Panggamhanan sa Davao del Norte ug ang mga siyudad ug munisipyo niini sa gipahigayon nga IEC Summit CY 2023 and Environmental Month Culmination niadtong Hunyo 27, 2023 sa Ritz Hotel, Davao City.
Gidawat ni Governor Edwin Jubahib ang mga dagkong pasidungog sa Probinsiya nga mao ang “Province to have attained 100% Approval of 10-Year Solid Waste Management Plan, including its Component Cities and Municipalities”; “Province to have 100% Approved and Updated 10-Year Solid Waste Management Plans, including its Component Cities and Municipalities, as of 1st Semester CY 2023”; “Province with the Highest Number of Functional Sanitary Landfill (SLF), as of 1st Semester CY 2023”; ug “As the First Province to have Initiated Cluster LGUs for Common Integrated Disposal Facility.”
Gipasidunggan sab ang mga mga dakbayan sa Tagum ug Panabo, ug mga lungsod sa Asuncion, Braulio E. Dujali, Carmen, New Corella ug Santo Tomas sa ilang maayong pagdumala sa mga Materials Recovery Facilities (MRF) nga gipundohan sa Environmental Management Bureau (EMB).
Ang lungsod sa Talaingod usab giila sa pagsustenar niini sa Solid Waste Management Equipment nga gidonar sa EMB.
Gipasidunggan pud ang Panabo City ug Island Garden City of Samal sa pagtukod nila og SLF, samtang giila ang lungsod sa Sawata (kanhi San Isidro) sa aprubado niini nga 10-Year SWM Plan, subay sa
Republic Act 9003 ug mga polisiya sa National Solid Waste Management Commission (NSWMC).
Sulti ni EMB-XI Regional Director Mario Bulacan, kini nga kadaugan sa Davao del Norte milabaw sa tanang mga “outstanding practices” sa solid waste management sa tibuok Rehiyon 11.
Gidalit ni Governor Jubahib ang maong kadaugan sa hiniusang kusog ug dedikasyon sa mga local government units, policy-makers, implementers, environmental advocates, stakeholders, ug mga komunidad tungod ug alang sa kaayuhan sa katawhan ug kinaiyahan.
Apan giklaro sa gobernador nga dili lang dinhi kutob, sanglit padayon ang probinsiya sa pagtutok sa dakong problema sa basura ug polusyon nga hatud sa nagkadaghan nga papolasyon ug modernisasyon.
“Let this recognition be a catalyst for change, and a call for action for everyone to come together and partake in the great responsibility of protecting our environment and our future,” ingon niya.
Gidayeg sab ni Environment Assistant Secretary Ruth Tawantawan ang tanang dumadaog, samtang nanawagan siya mga pakusgan pa ang pagtuman sa waste segregation sa mga komunindad.
“Hangyo jud ko sa inyoha nga ato jud ning himuon even sa atong respective households… we are one step closer towards a zero waste society… together let us take action for our environment…(since) the preservation of the environment is the preservation of life,” sulti sa opisyal. (PIA XI/Provincial Information Communication and Knowledge Management Office-Davao del Norte)
