SYUDAD SANG ROXAS, Capiz (PIA) – Gindeklarar sang Provincial Health Board ang probinsya sa idalum sang dengue outbreak agud mapadasig ang paghulag sang mga resources, mahatagan sang pagpasulabi ang mga response effort, kag mas mapasangkad ang kampanya sa pagpahibalo sa publiko kontra dengue.
Base sa pinakaulihi nga rekord sang Provincial Health Office (PHO), nagsaka sa 208 porsyento ang kaso sang dengue subong nga tuig kon ipaanggid sa pareho nga period sang nagligad nga tuig.
Sa kabilogan, may ara na sang 1,386 ka mga positibo nga kaso sang dengue ang probinsya, kun sa diin tatlo diri ang nagresulta sa kamatayon.
Kaangot diri, ginpahayag ni Gov. Fredenil Castro sa ti-on sang Provincial Health Board meeting nga ma-assign ang gobyerno probinsyal sang “fumigation team” sa kada cluster sang mga munisipyo sang probinsya agud magpatigayon sang fogging sa mga komunidad ilabi na gid sa mga eskwelahan.
Suno kay Dr. Roel Bermejo, Schools Division Superintendent (SDS) sang Roxas City, antes magbukas ang klase, nagpaguwa na sila sang Division Memorandum Order para ma tapna ang pagtaas sang kaso sang dengue sa mga eskwelahan.
Dugang pa niya, nakalunsyar na ang SDO Roxas City sang Project Safe nga nagatuyo nga maghimo sang hilway kag maabi-abihon nga palibot sa mga eskwelahan.
Ginpaathag man ni Cheryl Tacda nga provincial director sang Department of the Interior and Local Government (DILG) nga ang mga kabaranggayan sa probinsya ang nagapatigayon sang weekly nga clean-up activities nga ginamonitor sang ahensya.
“Pero subong, kinahanglan mag-focus kita sa mga posible nga breeding sites sang dengue,” dugang pa ni Tacda.
Ginhambal man sang gobernador nga sa suporta sang tanan, madaug ang probinsya kontra sa dengue, apang ini nagakinahanglan sang hilikuton, dedikasyon, kag suporta.
“Sigurado nga mapirde naton ang mga lamok nga nagadala sang dengue, wala sing duda nga magadaug kita batok sa dengue. Pero ini indi masolbar sang isa lang ka tawo, kundi ini isa ka kolektibo nga hilikuton sang tanan nga mga stakeholders kag pumuluyo sang aton probinsya,” dugang pa ni Castro. (AGP/PLF/PIA Capiz)
