SYUDAD SANG ILOILO (PIA) — Nagpirma ang Department of Environment and Natural Resources (DENR) 6 sang Memorandum of Understanding (MOU) kaupod ang mga miyembro sang Young Adult Worker Volunteer Group of Save the Earth from A to Z We Are One Family (ASEZ WAO) sang damlag lang bilang pagpakita sang ila pangako nga pag-amlig sang palibot kag pagpabag-o sang komunidad.
Ang grupo nga ginabug-osan sang mga Koreano kag Pilipino nga mga miyembro nagpanguna sa inisyatibo para ipabutyag ang ila suporta sa mga programa sang DENR Region 6 sa pagtipig sang palibot.
“This partnership, established through an MOU, is a vital step in promoting environmental stewardship and empowering communities to take an active role in protecting their natural resource,” siling ni DENR 6 OIC Regional Executive Director Raul L. Lorilla.
Kalakip sa MOU ang nanari-sari nga mga aktibidad nga nasanto sa Sustainable Development Goals (SDGs) kon sa diin ang duha ka mga grupo mahimo nga magpili sang ila kaupod nga igapatuman nga mga aktibidad.
Sakop man diri ang duha ka klase sang kampanya nga ila igapatuman kaangay sang Campaigns for Humanity nga kalakip ang educational support, well-being promotion, emergency relief, kag cultural exchanges.
Para sa Campaigns for Earth naman, yara ang climate change response, reduce plastic use, terrestrial ecosystem protection, kag marine ecosystem protection.
Ang napirmahan nga MOU sa tunga sang DENR 6 kag ASEZ WAO epektibo sa isa ka tuig apang ini mahimo nga mapalawig sa ti-on nga ang duha ka grupo magdesisyon nga padayunon ang mga kasugtanan.
Ang kasugtanan nagatingob na subong sa duha ka grupo para updon ang ila mga hilikuton agud malab-ot ang katuyuan nga maamligan ang palibot kag mapasanyog sang tayuyon ang mga komunidad.
Ang ini nga pag-updanay nagatuyo man sa paggamit sang mga kabakod kag mga resources sang duha ka organisasyon sa pagpatuman sang mga programa nga indi lamang makahatag proteksyon sang palibot kundi makapasanyog man sang mga lokal nga komunidad. (AAL/AGP/PIA 6 kalakip ang mga balita gikan sa DENR 6)
