SYUDAD SANG ROXAS, Capiz (PIA) — Nagpatigayon ang Department of Environment and Natural Resources (DENR) Capiz kaupod ang mga partner stakeholders sang “discovery dive” sa Tucad Reef sa banwa sang Pilar bilang preparatory activity sa pagahiwaton nga Protected Area Sustainability Assessment (PASA).
Kabahin man sang aktibidad ang simulation assessment para sa seagrass diversity, nga nakarekord sang madamo nga populasyon sang Cymodocea kag Enhalus nga mga species, nga nagaserbe bilang nursery grounds sang nagkalain-lain nga mga lamang dagat.
Gindokumento man sang grupo ang presensya sang sea anemones (Actiniaria), sponges (Porifera), feather duster worms (Sabellidae), whip corals (Ellisellidae), kag hammer coral (Fimbriaphyllia ancora) nga nagapabaskog sang ebidensya sang rich biodiversity kag overall health sang marine environment sang Tucad Reef.
Suno sa DENR Capiz, ang mga datos nga nakuha halin sa discovery dive pagagamiton sa pagkumpleto sang PASA kag suporta sa rekomendasyon nga isakop ang Tukad Reef sa idalom sang National Integrated Protected Areas System (NIPAS).
Nagpanawagan man ang DENR sang kooperasyon sang lokal nga komunidad, mga ahensya sang gobyerno, kag sa publiko nga magbuligay sa pagprotekta sang marine habitat sang probinsya.
Ginpahayag man ni DENR Provincial Environment and Natural Resources Officer Ernest Federiso ang ecological kag economic nga importansya sang Tukad Reef kag ang potensyal sini bilang isa ka eco-tourism.
“The Tukad Reef does not stand alone. It is interconnected with mangroves, seagrass beds, and coral reefs. Seagrass in particular, acts as a natural barrier against siltation, which threatens coral reefs, reef fishes and other marine life,” suno kay Federiso.
(Ang Tukad Reef, hindi lang bilang isa. Ini konektado sa mga mangroves, seagrass beds, kag coral reefs. Ilabi na gid ang seagrass, kun sa diin naga-akto ini bilang baral batok sa siltation nga nagaapekto sa coral reefs, mga isda sa bato, kag iban pa nga mga marine life.)
Sa piyak nga bahin, magahiwat man sang Foreshore Survey and Mapping activity ang DENR sa 30 ka mga coastal barangays sa syudad sang Roxas kag sa mga banwa sang Pilar, Ivisan, kag Sapian para mapasanyog kag mas tayuyon nga pagdumala sang coastal resources sang probinsya. (AGP/PLF/PIA Capiz)
