SYUDAD SANG ILOILO (PIA) — Kaangot sa Zero Waste Month nga kampanya subong nga Enero, ginahingyo sang Department of Environment and Natural Resources (DENR) 6 ang publiko nga ikabuhi ang “waste-free habits” kag alternatibo nga environment-friendly practices.
Ang tema sang kampanya subong nga tuig amo ang “Integrating Sustainability and Circularity into the Informal Waste Sector.”
“As we celebrate this Zero Waste Month this January 2025, let us prioritize doing the best for our environment. There is no Planet B nor another Earth. Thus, it is imperative that we take care of this precious planet,” siling ni DENR 6 Regional Executive Director Raul L. Lorilla.
Dugang pa niya, kon gusto naton sang maayo nga buwas-damlag, kinahanglan naton nga mag-ubra sang husto sa pagsiguro nga magpabilin nga matinlo ang aton palibot para sa aton ginalantaw nga “Zero Waste Future.”
Suno pagid sa DENR, ang edukasyon, interbensyon sang mga lokal nga pangulohan, kag panimuot sang mga konsumidor nga nagapadulong sa aktibo nga pakigbahin sa waste practices ang mga kinahanglan sa pagsabat sang mga problema sa solid waste management.
Subongman, ginalantaw sang DENR nga ang mas mabaskog nga pagpatuman sang RA 9512 ukon ang Environmental Awareness and Education Act of 2008 ang magapasangkad sang ihibalo kag makapabag-o sang panimuot sa mga buluthuan.
Dugang pa diri, ang pagpalapnag sang mga kampanya nga naga-engganyo sa mga residente nga ikabuhi ang waste-reducing habits kag ipatuman ang waste-free practices kaangay sang “No Single Use Plastics in Market Day” ukon pagdula sang plastic utensils sa mga establisyemento ang kinahanglan man.
“By embracing circular economies with 3Rs (Reduce, Reuse, Recycle), leveraging technology, engaging communities, implementing supportive policies, and fostering conscious consumerism, we can pave the way for a cleaner planet. The journey toward zero waste is tough but is worth taking, worth achieving,” suno kay Lorilla. (AGP/PIA 6 kalakip ang mga balita gikan sa Boracay Island News Network kag DENR 6)