SYUDAD SANG ILOILO (PIA) — Samtang nagapadulong ang eleksyon sa Mayo 2025 kag nagsuod na ang 90-diyas nga kampanya sang Pebrero 11, ginahinyo sang Department of Environment and Natural Resources (DENR) 6 sa tanan nga mga kandidato nga pasulabihon ang palibot kag likawan ang pagsab-it kag paglansang sang ila mga poster ukon materyal para sa kampanya sa mga kahoy.
Suno kay DENR 6 Regional Executive Director Raul L. Lorilla ila ginhinyo ang tanan nga kandidato nga usaron ang mga gindesignar nga lugar para sa ila mga materyal kag proteheran ang mga kahoy batuk sa halit.
Gin-enganyo man sini ang mga kandidato nga kon sila ang magdaug ukon mapierde, nga liwat nga gamiton ukon repurpose ang ila mga materyal sa kampanya agud indi ini magkadto sa ulihi sa landfill.
“After the long-days of campaigning and posting, candidates should also consider the long-term effects of their posters in our environment. We encourage them to repurpose or dispose it properly, especially the one made out of plastics,” gindugang ni Lorilla.
Ginamando sa idalom sang Presidential Decree 953, ang pag-utod, ang pag-guba ukon pagsamad sang gintanum kag nagatubo nga mga kahoy, mga nagapamulak nga tanum kag shrubs ukon tanom nga may scenic values sa mga publiko nga dalanon, sa mga plaza, parke, sa palibot sang buluthuan ukon sa bisan diin man nga public ground ginadumilian magluwas kon kinahanglanon para sa kaluwasan sang publiko ukon sa pagpatahum kag kung maaprobahan gid lamang sang natungdan nga otorisado nga tiglawas. Magapangatubang ang mga nagalapas sang pagkabilanggo sang anum ka bulan tubtub duha ka tuig kag/ukon multa nga nagalab-ot P500 tubtub P5,000.
Ang pagsab-it ukon paglansang sang mga materyal sa kampanya sa mga kahoy makatuga sang talalupangdon nga halit sa panit nga nagaserbe bilang protective layer sang kahoy. Ini nagataguga man sang entry points para sa mga balatian kag peste, kag makahalit sa cambium layer, isa ka crucial tissue nga nagadala sag tubig kag nutrients sa bilog nga kahoy. Ang kasubong nga mga kasamaran mahimo makatuga sang stress sa kahoy kag mangin mas labi nga vulnerable sa mga isyu natuhoy sa ikaayong lawas. (AAL/LAF/PIA Iloilo)
