TAGBILARAN CITY, Bohol, Jan. 13 (PIA) — Gipahinumdoman ni Department of Human Settlements and Urban Development (DHSUD) Kalihim Jose Rizalino Acuzar ang publiko nga sa mga awtorisadong ahensya o indibidwal lamang modulo kalabot sa Pambansang Pabahay para sa Pilipino Program ni Presidente Ferdinand R. Marcos Jr.
Matud pa ni Acuzar sa usa ka pahayag nga kini aron makalikay sa mga grupo ug pipila ka indibidwal nga mangingilad.
“Let me stress that no private individuals or groups are authorized to act on behalf of DHSUD with regards to Pambansang Pabahay. We are ready to take appropriate action to any report of such unscrupulous act
(Tugoti ko nga hatagan og gibug-aton nga walay pribadong indibidwal o grupo ang awtorisado nga molihok alang sa DHSUD kalabot sa Pambansang Pabahay. Andam kami nga mohimog angay nga aksyon sa bisan unsang taho sa maong dili maayong buhat),” pasidaan ni Acuzar.
Matud pa niini nga gawas sa DHSUD, mahimo usab moduol o mangutana ang publiko sa local government units (LGUs), Home Development Mutual Fund o Pag-IBIG Fund, Social Housing Finance Corporation, National Home Mortgage Finance Corporation ug National Housing Authority.
“Tayo po’y magsama-sama at magtulung-tulong sa hangaring matupad ang pangarap ng bawat pamilyang Pilipino na magkaroon ng sariling tahanan na disente, ligtas at abot-kaya,” pahayag pa ni Acuzar.
Gibutyag niini nga sa pagkakaron, naa sa 49 ka Memoranda of Understanding na ang gilagdaan sa DHSUD sa nagkalain-laing LGUs sa tibuok nasud sukad gilusad ang “Pambansang Pabahay” niadtong Setyembre sa niaging tuig.
Nanghinaot ang kalihim nga mo-arangkada og maayo karon ang programa diin ang target mao ang makapatukod og usa ka milyong pabahay matag tuig aron masulbad ang 6.5 milyong backlog sa pabahay. (ECB/PIA7 Bohol)
