TAGBILARAN CITY, Bohol (PIA) – Sa nagkanihit nga mga katre sa mga tambalanan sa Bohol tungod sa dengue, tambag ni Provincial Health Officer Dr. Cesar Tomas Lopez, kadto lamang dalhon sa mga tambalanan ang mga kaso sa dengue subay sa iyang seryoso nga hulga.
Didto sa tigum sa Provincial Anti Dengue Task Force niadtong Septembre 3, gibutyag sa mananambal nga bag-ong hepe sa Provincial Health Office puli sa hingretiro nga si Dr. Reymoses Cabagnot, nga gikinahanglan ang mga pasyente nga una nga makit-an didto sa mga Rural Health Units (RHUs) aron mahimoan sa inisyal nga sitwasyon.
Dason sa mananambal nga dili tanan nga kaso sa dengue, kinahanglan gayud dalhon sa ospital.
Bisan kon virus ang kina-ingnan sa sakit ug walay usa ka tambal nga epektibo alang niini, ang pasyente sa dengue kinahanglang atimanon subay sa gipakita nga sakit sama sa hilanat.
Kritikal sa dengue mao ang pag-ila sa platelets nga anaa sa dugo.
Alang sa normal nga tawo nga walay suliran sa dengue, ang ihap sa platelets anaa sa 150,000 ngadto sa 450,000 sa matag micro liter sa dugo.
Sa mga pasyente sa dengue, ang platelet count mahimong mokanaug ngadto sa 10,000 matag microliter, ug niining sitwasyona, mahimong mahitabo ang pagdugo o bleeding.
Angayan nga matan-aw ang mga simptomas sa dengue sama sa pagdugo sa mga lagus, ilong, sa ihi o sa hugaw, grabe nga sakit sa tiyan ug pagsuka-suka, kalibanga, nga maoy kina-ingnan sa pagkadehydrate, pagkaluya ug paglisud sa pagginhawa.
Kong ang platelet count, taas pa, buot ipasabut nga kaya sa lawas nga dumalahon ang sakit og mahimong sa balay lamang kini atimanon.
Kinahnaglan sa pasyente nga dili madehadrate, mao nga atimanon ang water intake, fruit juices ug oral rehydration solutions, nga makuha nga libre sa mga Rural Health Units.
Hinuon, dili angayan nga paimnon og softdrinks, kape, o ilimnong makahubog, nga maka-dehydrate ug mga pagkaon nga dark ang color o mga pagkaon nga itumon aron dili masaypan ang hugaw o suka nga dugo, tungod sa itumon nga nakaon.
Kini sanglit mismong si Dr. Mike Jayoma, ang miangkon nga nagsugwak na ang 75 ka katre nga kapasidad sa President Carlos P. Garcia Provincial Hospital, sa Talibon.
Ang hulagway sa ospital sa ospital sa Talibon, dili iglahi sa mga tambalanan nga iya sa Kapitolyo.
Kini usab ang gipaambit ni Dr. Josephine Jabonillo sa Cong. Simeon Toribio Memorial Hospital sa Carmen.
Tunogd usab niini, samtang gilauman nga ikadeklara sa Sangguniang Panlalawigan sa Bohol ang state of calamity sa ilang sesyon, gilauman usab nga ang mga kalungsuran, magbuhi na usab sa ilang mga pundo aron may ikapalit sa mga gikinahanglan alang sa pagpalit og dugang testing kits ug rehydration solutions pangontra sa dehydration, dala sa dengue ngadto sa mga pasyente. (RAHC/PIA Bohol)
