CAMIGUIN (PIA) — Gibansay ang 19 ka senior high school students gikan sa national high schools sa Mambajao ug Yumbing sa 80-oras nga work immersion program nga gihimo sa Department of Information and Communications Technology (DICT)-Camiguin gikan Pebrero 4 hangtod 19, diin giandam sila sa batakang digital literacy, coding, ug mobile robotics skills aron sila andamon para sa umaabot nga ICT careers.
Ubos sa tema, “We Make Coding Fun for the Youth of Camiguin,” gitudloan ang mga estudyante og mga kahanas, partikular sa paggamit sa Google Spreadsheets, Google Docs, ug Minecraft Education coding.
(Photo courtesy of DICT-Camiguin)
“Empowering the next generation starts here. We are committed to expanding opportunities for young minds in Camiguin, preparing them for exciting ICT careers in the digital era,” miingon si DICT-Camiguin Provincial Officer James Sagocsoc.
(Ang paghatag og gahum sa sunod nga henerasyon magsugod dinhi. Determinado kami nga palapdan ang mga oportunidad alang sa mga batan-on sa Camiguin, aron andamon sila para sa mga karera sa ICT sa digital nga panahon.)
Gipaambit ni James Nathaniel Diaz, usa ka Grade 12 Science Technology Engineering Mathematics (STEM) student gikan sa Mambajao, nga ang immersion naghatag og oportunidad sa kabatan-onan ug usa kini ka paagi aron makasabay sila sa mga kalamboan sa teknolohiya.
“Dapat pud makatuon ta sa mga technology nga angay tun-an kay para dili ta ma-late bitaw or dili ta mabyaan sa uban kay sa technology. Wala’y impossible,” gibutyag ni Diaz.
Giisip sa mga partisipante nga mapuslanon ang programa tungod kay kini nagpalapad sa mga oportunidad para sa kabatan-onan sa ICT sa Camiguin ug nagtugma sa ilang gipiling career path.
Miingon si Shaira Acson, usa ka estudyante gikan sa Yumbing, “Nakatabang siya sa akoa kay ang akoa man gyud plano kuhaon sa future kay mag kuan ko sa IT tapos mag-focus siya sa katong cyber security. Mao nang makadungog ko nga katong gipangtudlo ni sir sa akoa is dako na kaayo ang advantage bitaw in the near future.”
Pinaagi sa mga inisyatiba sama niini, miingon si Sagocsoc nga ang DICT Camiguin nag-andam sa dalan para sa sunod nga henerasyon sa tech professionals, nga nagpasiguro nga ang mga estudyante andam sa mga kahanas nga may kalabutan sa karera.
“I highly recommend this program to future immersants, as it would be a great choice of immersion,” miingon si Christian Roa, usa ka STEM student gikan sa Mambajao.
(Girekomenda ko pag-ayo kini nga programa alang sa mga umaabot nga mga immersants, kay kini usa ka maayong kapilian alang sa immersion.)
Gidisenyo sa DICT ang programa aron tabangan ang mga estudyante sa pag-aplikar sa kahibalo sa klase ngadto sa tinuod nga kahimtang, pagtukod og praktikal nga kahanas, ug pagtuki sa ilang career interests. (JPDA/PIA-10)
