SYUDAD SANG ILOILO (PIA) – Ginhatagan pagtamod sang Department of Information and Communications Technology (DICT) ang potensyal sang Western Visayas sa pagpasanyog sang digital ecosystems sa ginhiwat nga Regional ICT Summit and Exhibitions (RISE) sang Sept. 25, 2024.
Ginpahayag ni DICT Undersecretary for ICT Industry Development Jocelle Batapa-Sigue, sa isa ka press conference, nga ang rehiyon nangin handa na kag kinahanglan lang sini ang dalayon nga bulig gikan sa nagkalain-lain nga stakeholders.
“We are ready, we have been ready. But we need to continue to be ready to evolve. The demands of the industry have become complicated,” suno kay Batapa-Sigue.
Gintumod man sini nga ang Western Visayas may ara sang duha ka Centers of Excellence – ang mga syudad sang Bacolod kag Iloilo kag isa ka digital city, ang Roxas City – rason nga posible nga magpanguna ang rehiyon sa pagpasanyog sang digital ecosystem.
Dugang pa ni Batapa-Sigue nga ang rehiyon may ara sang isa ka skilled talent pool gikan sa de-kalidad nga mga unibersidad, isa ka manami nga business environment, mabakod nga imprastraktura kag road systems.
Ang industriya sang Information Technology and Business Process Management (IT-BPM), suno sa DICT, nakahatag na sang mga 100,000 ka mga trabaho sa Western Visayas, kag nag-amot sang ginabanta P1 bilyon nga bulanan nga sweldo.
Ang RISE nga nangin kabahin sang apat ka adlaw nga Western Visayas Innovative Startup Festival ang nagalaum man nga makilala ang rehiyon bilang sentro sang mga trabaho natuhoy sa ICT, pamuhunan kag mga oportunidad sa teknolohiya, kung sa diin mas mahatagan man importansya ang pagtukod sang ICT councils para sa padayon nga pagsanyog sang ekonomiya. (AAL/JNH/PIA Iloilo)
