SYUDAD SANG ILOILO (PIA) — Ginpahibalo sang Department of Information and Communications Technology (DICT) ang pila sa mga katapo sang media sa Western Visayas tuhoy sa cybersecurity kon sa diin sila nahatagan sang ihibalo sa cyber threats, online safety, device security, kag cybercrime reporting.
Ginhatagan pagtamod ni DICT Antique Provincial Office Planning Assistant Kent Arnel Jaragbas ang pag-obserba sang komprehensibo nga mga estratehiya sa cybersecurity.
“Some of the strategies for online security include avoiding public Wi-Fi for sensitive transactions, ensuring your connection is secure, not sharing personal information online, monitoring financial accounts and credit reports, implementing network segmentation, and utilizing strong access controls,” pahayag ni Jaragbas.
Kabahin man sang diskusyon ang “Phishing” ukon “fraudulent attempts” para takawon ang mga sensitibo nga impormasyon nga nagapakuno-kuno bilang mga masaligan nga mga ahensya.
Gintalakay man ni Jaragbas ang nagkalain-lain nga sahi sang Phishing kaangay sang Smishing (paggamit sang patalang nga text messages para madayaan ang nakabaton nga maghatag sang personal nga impormasyon ukon mabuksan ang mga malisyoso nga links), Vishing, Spear Phishing, Whaling, kag Quishing (pagpamahog kon sa diin ang mga attackers nagabuhat sang QR codes para dal-on ang mga biktima nga bisitahon ukon i-download ang mga malisyoso nga content).
“To avoid Phishing attacks, you must avoid clicking on suspicious links or attachments, always verify the identity of the sender or caller and website URLs before entering sensitive information, use a URL Expander Tool (checkshorturl.com), and verify links with security tools (virustotal.com),” siling ni Jaragbas.
Iya man ginpakigbahin ang iban nga pagsulundan para mahibal-an ang isa ka Phishing email, kon sa diin ini may urgent nga subject lines, indi kinaandan nga mga pangabay, kaduda-duda nga mga links ukon attachments, kag impersonal ukon general type nga sahi sang pambungad, gani, kinahanglan nga i-double check ang address sang tagapadala.
Sa ti-on nga may kaso sang cybercrime, ginalaygayan ang publiko nga amligan ang ebidensya, i-report sa mga online platform, pahibal-on ang personal nga bangko, kag i-report sa mga awtoridad paagi sa Inter-Agency Response Center sa mga numero 09477147105 (Smart), 09669765971 (Globe), kag 09914814225 (DITO).
Ang cybersecurity briefing ang ginpangunahan sang Philippine Information Agency kaupod ang DICT bilang kabahin sang kampanya sang gobyerno sa Media kag Information Literacy. (AAL/AGP/PIA 6)
