TAGBILARAN CITY, Bohol, Jan. 20 (PIA) — Planong magbutang ang Department of Information and Communications Technology (DICT) og one-stop shops sa mga hilit nga lugar aron makaparehistro ang mga subscribers sa ilang SIM card, dungan sa pagkuha og valid ID alang niini.
Sa usa ka virtual event nga gi-organisa sa Smart Communications, miingon si Information and Communications Technology Undersecretary Anna Mae Lamentillo nga nakahinabi na nila ang Department of Justice (DOJ) aron magbutang usab sila og booth aron makakuha ang publiko og National Bureau of Investigation (NBI) clearance.
Sa ingon niining paagi, masolbad ang problema sa kakulang sa valid government-issued ID sa katawhan.
Kahinumdoman nga gi-awhag sa pribadong sektor ang gobyerno nga paspasan pa ang pagpagawas sa national ID alang sa SIM card registration.
“While some may find it inconvenient because of the requirements, these are actually necessary because our goal is to deter crime, to prevent those who want to perpetrate crimes by taking advantage of the anonymity of SIMs (Samtang ang uban naglisud tungod sa mga kinahanglanon, kini sa tinuod kinahanglan tungod kay ang among katuyoan mao ang pagpugong sa krimen, aron mapugngan ang mga gusto nga maghimo sa mga krimen pinaagi sa pagpahimulos sa dili pagpahibalo sa mga SIM),” pagtumbok pa ni Lamentillo.
Nakig-alayon na usab ang DICT sa uban pang ahensya sa gobyerno sama sa National Telecommunications Commission (NTC) ug Department of Interior and Local Government (DILG), aron mahipno na ang guidelines sa pagpahigayon sa SIM registration sa mga geographically isolated and disadvantaged areas (GIDA). (ECB/PIA7 Bohol)
