TAGBILARAN CITY, Bohol (PIA) – Mas pili-on pa sa Department of Interior and Local Government (DILG) ang pagtamud sa Local Government Code (LGC) kay sa manduan na ang mga Lokal nga Kagamhanan sa unsay angayan nga buhaton.
Kini maoy piho nga tubag ni DILG director for Bureau of Local Government Development Anna Liza Bonagua, diha nga gipangutana konmahimo bas a DILG nga isyuhan og Mamorandum ang mga local chief executives nga hatagan og daku nga pahat ang mga programa sa agrikultura tungod sa panginahanglan sa seguridad sa pagkaon.
Didto sa paglusad sa Resilient Intervention for Sustainable Economy for Local Government Units (RISE-LGUs) nga gipasiugdahan sa DILG-7 ug sa Cebu Provincial Government, usa sa mga minglutaw nga isyu nga nakapahinay sa pagbangon human sa pandemya mao ang kawala nay pundo nga gipahat sa mga LGUs ngadto sa agrikultura.
Si Bohol acting provincial agriculturist Larry Pamugas, atul sa maong kalihukan, mingbarug aron ipaambit ang kalahian sa panahon nga ang gahum sa Department of Agriculture wala pa ma devolve ngadto sa LGUs subay sa LGC.
Karon nga napalain na ang gahum sa pagdumala sa agrikultura ngadto sa mga LGUs, kadaghanan sa mga local chief executives, namatikdan sa mga nagdumala sa agrikultura nga nagkanipis ang pahat alang sa panguma, nga unta mao may tinubdan sa pagkaon.
Gani, saysay ni Pamugas, talagsa ra anga ang LCEs may panglantaw nga nahasibu sa programa sa agrikultura, hinungdan gani nga pipila lamang ka mga Municipal Agriculture Offices ang may igo nga sustento, ug ang mga tawo didto, motuman sa mga mandu gikan sa DA nga gipaagi sa Office of the Provincial Agriculturist (OPA).
Ang OPA, nahimo na lamang nga buatan nga walay sakop sa kalungsuran, ug sa paghatag nial sa mga extension services, daghan pang mga kalungsuran nga moreklamo tungod sa kakuwang sa pahat alang niini.
Kini maoy punto ni Pamugas, kinsa mihangyo sa DILG kon pwede ba nga sila ang magmandu sa LCEs nga hatagan og daku-dako nga pundo ang agrikultura.
Apan, dason ni Bonagua, sanglit ang gahum anaa na sa LGUs, mas palabihon pa sa DILG nga e-i-exercise sa LGUS ang ilang gahum, kay sa manduan nila ang lungsod sa unsay angayan buhaton. (RAHC/PIA Bohol)
