Ang pipila ka mga sakop sa Dimiao Young Aspiring Visual Artists giubanan nila ni CCAD head Emerson Pinos, digital visual artists sa CCAD Sherwin Sapong, BACH council chairperson Argeo Melisimo ug Board Member Lawrence Angcla. (PIA Bohol)
TAGBILARAN CITY, Bohol (PIA) — Gibuksan didto sa hawanan sa katawhan sa Kapitolyo ang Dimiao Young Aspiring Visual Artists (DYAVA) art exhibit 2025 agi og tampo sa mga taga Dimiao alang sa pagsaulog sa Arts Month.
Arts exhibit nga mugna sa mga artists sa Dimiao nga natukod niadtong panahon sa pandemya, ang matag usa sa grupo duga na nga nangandoy nga makabaton og kapahungawan sa ilang mga kabalaka, kahingawa ug mga mamugnaong kapasidad, midangop sa paghiusa aron pinaagi sa visual arts, ilang mapadayag ang ilang mga hunahuna, saysay ni Eljohn Balaba, usa sa mga young artists.
Niadtong panahona, diha nga nagsugod pa lamang ang mga batan-ong artists, nakahimo sila sa unang exhibit didto sa munisipyo sa pagtugot ni Mayor Randolph Ang, saysay niya.
Karon, isip fifth year nga tinun-an sa Architecture sa Bohol Island State University, si Balaba usa na sa mga gitahud nga young artists kang kinsa nga major work, maoy gihimo nga centerpiece sa exhibit nga nagsaulog sa Bohol isip Geopark, sa kinaiyang Bol-anon ug sa kalikopan niini.
Didto sa pagbukas nga seremonyas, gibatbat usab ni Argeo Melisimo nga gikinahanglan ang suporta sa Arts isip pamaagi sa mas lapad ug mas inclusive nga pag-ugmad.
Kalihukan nga gitanyag sa DYAVA inabagan sa Provincial Government of Bohol, Center for Culture and Arts Development, Bohol Arts and Cultural Heritage Council, Municipality of Dimiao ug sa National Commission for Culture and the Arts, ang arts exhibit magpadayon sa entire buwan sa Pebrero. (RAHC/PIA Bohol)
