SYUDAD SANG ILOILO (PIA) – Matapos ang madinalag-on nga paghiwat sang Dinagyang Festival 2025, magabida naman ang world-class nga selebrasyon sang kultura kag pagtuo sang mga Ilonggo sa iban nga pungsod.
Ini matapos nga nakabaton sang imbitasyon ang Iloilo Festivals Foundation Inc. (IFFI) sa pungsod New Zealand agud igabida didto ang manami nga kultura sang mga Ilonggo pinaagi sa performance sang Tribu Paghidaet nga nangin kampyeon sa ginhiwat nga 2025 Dinagyang Tribes competition.
Magluwas diri, nakabaton man sang imbitasyon ang Tribu Paghidaet halin sa La Paz National High School nga mag-perform sa World Expo 2025 nga hiwaton sa Osaka, Japan sa Hunyo.
“Our Dinagyang is set to take the international stage, and we are excited to showcase our strength and the Dinagyang warriors’ resilience to the world,” pahayag ni IFFI president Allan Ryan Tan.
Ginkalipay man ni Iloilo City Mayor Jerry P. Treñas ang impormasyon, kun sa diin iya ginpahayag nga ang Dinagyang Festival simbolo man sang pag-ugyon kag pagkamamugnaon sang mga Ilonggo.
“We are excited. This opportunity reignites our excitement to once again showcase internationally our pride and joy, the Dinagyang Festival. It has always been a symbol of our faith, culture, unity and creativity, and now, more than ever, we are eager to present the best of what we have to offer to a global audience. The international stage awaits, and we are ready to dazzle and impress,” siling ni Treñas.
Kun matandaan, ulihi nga nabida sa luwas sang pungsod ang Dinagyang Festival sang 2018 pinaagi sa pag-perform sang Tribu Panayanon sa New York City.
Samtang, sa selebrasyon sang Dinagyang Festival 2025, nangin madinalag-on ang Tribu Paghidaet kontra sa pito pa ka mga tribu sa ginhiwat nga Dinagyang Tribes competition sang Enero 26 matapos ini magpakita sang madinuagon nga performance.
Nakuha man sang Tribu Paghidaet ang Best in Costume Design and Headdress kag Best in Performance awards kag nakabaton sang P1.2 milyones nga premyo bilang kampyeon sa sang Dinagyang Tribes competition.
Ginhingadlan naman nga first runner-up ang Tribu Pan-ay sang Fort San Pedro National High School kag nakabaton sang P700,000, samtang P500,000 ang ginhatag sa Tribu Ilonganon sang Jalandoni Memorial National High School bilang second runner-up; kag P300,000 para sa third runner-up nga Tribu Salognon sang Jaro National High School. (AAL/JNH/PIA Iloilo)
