SYUDAD SANG ILOILO (PIA) – Maluwas sa mga tribes’ competitions kag mga relihiyoso nga aktibidad nga nagapakita sang pagtuo kay Señor Sto. Niño, nagbukas man sang oportunidad para sa mga magagmay nga mga negosyante ang pagsaulog sang 2025 Dinagyang Festival diri sa syudad sang Iloilo.
Nagkalainlain nga food stalls kag kiosks, lakip na ang accessories, footwears, kag iban pa nga mga kagamitan ang nakahilera sa mga kalye sang Iloilo City, nga nagganyat sa mga tagsaulog sang aktibidad.
Suno sa mga nag organisa, may masobra 500 ka kiosks ang gintukod sa mga kalye sang Bonifacio Drive, Delgado, Iznart, Mapa, Solis, kag Valeria para sa selebrasyon.
Ang mga aktibidad nangin pamaagi para sa mga negosyante nga makakuha sang mas dako nga kita kung ikumpara sa ila naagum sa mga regular nga adlaw.
Suno kay Jasmin Mangubat, 45 anyos, sang “Kramjalz Printing,” isa ka t-shirt printing business nga gikan pa sa Davao City, ini ang ila ika-apat na nga tuig sa pagpasakop sa tuigan nga aktibidad.
“So far, okay ang every year nga balik-balik ko diri sa Iloilo. Ngayon dito, mura lang kami dito, yung printed shirts namin ay ibinebenta sa halagang P200. Pag manual o made to order, ang presyo ay P250. Sa whole duration siguro ay makakabenta kami ng almost P200,000,” pagpakigbahin ni Mangubat.
Para naman sa 52 anyos nga negosyante kag tag-iya sang “Big Girl” food kiosk nga si Joena Mangada, isa man ka dako nga bulig ang Dinagyang para magsustenir sang ila mga pang-adlaw-adlaw nga mga kinhanglanon.
“Nabudlayan gid nga daan kami, gina-rolling lang namon ang amon kapital kag ang amon food stall amo ang main source namon ka income. Subong nga Dinagyang, nagasira kami mga 10 p.m. ukon 11 p.m. kada adlaw, mayad gawa kay mas damo ang amon kita,” siling ni Mangada.
Dugang pa diri, suno kay Judith Libardo, isa sa mga staff sang food kiosk nga “Ballers Grillers” nga yara na sa ikatatlo nga tuig sa pagpakigbahin sa Dinagyang Food Fest, ang selebrasyon nagahatag man kahigayunan para makakuha sang kita, kaangay lamang sa iya kag mga kaupod niya nga apat ka bilog nga gin-hire sa karon nga tuig para mag-obra sa food kiosk.
“Kung maayo ang kita sa tatlo ka adlaw nga food fest, kami nga mga hired crew makakuha P3,500 kada isa, kag halin pag-umpisa namon sadto P1,500 ang pinakamanubo namon nga nabaton,” pagpa-athag ni Libardo. (AAL/AGP/PIA 6)
