November 20 – Malampusong gipahigayon ang “Dipolog Teens Got Talent 2023” nga adunay tema’ng “Healthy, nourished, sheltered: Ensuring the right to life or all!” sa miaging buntag, November 17, 2023 didto sa Dipolog Sports Complex, ning siyudad nga gipangunahan sa Kagamhanang Lokal ning dakbayan pinaagi sa buhatan sa City Social Welfare and Development. Subay kini sa pagsaulog sa nasudnong bulan sa kabataan kon “National Children’s Month” ning tuiga nga gipangunahan sa Department of Social Welfare and Development Office.
Tumong sa maong aktibidad mao ang pagpakita sa lain-laing mga talento ug kahanas sa mga kabatan-onan gikan sa mga nagkalain-laing eskwelahan sa sulod ug palibot ning siyudad.
Mitambong sa maong kalihokan sila si City Councilor, Hon. Marilou Y. Calibo (kinsa mirepresentar kang City Mayor Darel Dexter T. Uy), Assistant City Social Welfare and Development Officer, Ms. Jovencia D. Orilla, Social Welfare Officer III, Mr. John Pelmar M. Pelpinosas (kinsa mirepresentar kang City Social Welfare and Development Officer, Ms. Arlene O. Jatico) ug Social Welfare Officer III, Mr. Patrick S. Jalapadan, kinsa mipabati sa ilang tagsa-tagsa ka mga mensahe atol sa gipahigayong kalihokan.
Tipik sa mga indigay nga gipahigayon sulod sa maong programa mao ang “Hugot Singing Contest”, “Poster Making Contest”, “Dance Challenge Contest” ug “Spoken Poetry Contest” nga gisalmotan sa mga kabatan-onan gikan sa nagkalain-laing mga eskwelahan dinhi sa siyudad. (NBE/CIO-jnp)
