ILOILO CITY (PIA) – Isa ka Search, Rescue and Retrieval (SRR) team ang gintukod sang gobyerno probinsyal kaupod ang uniformed sector agud mapasanyog ang emergency kag disaster response capabilities sang Iloilo.
Pormal nga natukod ang hubon matapos ang pagsinapol sang Iloilo Provincial Disaster Risk Reduction and Management Council (PDRRMC) sang Agosto 15, 2024 kasunod sang pagpirma sang memorandum of agreement (MOA) sang Iloilo provincial government, Iloilo Police Provincial Office (IPPO), Philippine Coast Guard (PCG)-Iloilo, Bureau of Fire Protection (BFP)-Iloilo, 301st Infantry Bridge sang Philippine Army, Regional Maritime Unit, kag Philippine Red Cross Iloilo.
Ang MOA ginpirmahan ni Gov. Arthur Defensor Jr., IPPO director Police Colonel Bayani M. Razalan, PCG-Iloilo station commander Jan J. Terazona, BFP-Iloilo fire marshal F/SSupt Bartolome O. Beliran, 301st Infantry Brigade Commander Brigadier General Michael G. Samson, Regional Maritime Unit Police Colonel Ervin Glenn U. Provido, kag Philippine Red Cross Iloilo Chapter Administrator Gilbert Paul L. Valderrama.
Ang MOA nagabalay sang mga katungdanan kag mga responsibilidad sa pagpahapos kag pagpabakod sang koordinasyon sa tion sang mga kalamidad kag mga emerhensya agud mabuhinan ang posible biktima sang mga emerhensya.
Ginpahayag ni PDRRMC chief Cornelio Salinas nga sa idalum sang nasambit nga kasugtanan, ang SRR-Iloilo Team ang maga-deploy sang 16 ka well-trained Search and Rescue teams agud suportahan ang emergency response efforts sang probinsya.
Sa tion naman sang man-made disasters nga nagakinahanglan sang madasig nga atensyon, gilayon nga i-activate sang gobyerno probinsyal ang SRR-Iloilo-Team para sa madasig nga deployment kag magahatag man ini sang kinahanglanon nga logistic support sa team.
“The team shall collaborate closely with the LGU; facilitate essential training sessions for Iloilo’s emergency responders; and organize joint training exercises and drills,” pahayag pa ni Salinas kung sa diin isa man ka Joint Operations Center ang pagatukuron para sa mas madasig nga paghatag sang impormasyon. (AAL/JNH/PIA Iloilo)
