KALIBO, Akan (PIA) – Nagtao it bulig pinansyal ro Department of Migrant Workers (DMW), kaibahan ro Office of the Provincial Public Employment Service Manager sa idaeum it Aksyon Kalinga at Saklolo para sa mga OFW na Nangangailangan (AKSYON) Fund, para sa nagapangabudlay nga mga Overseas Filipino workers (OFWs) ag mga myembro it andang pamilya.
Ro pagpanupod hay ginpangunahan ni DMW Region VI OIC-Regional Director Glenda Aligonza, Joseph Areno, Chief Labor and Employment Officer ng DMW Region VI, ag Vice Gov. Reynaldo Quimpo.
Sa mensahe ni Quimpo, nagpaathag imaw it pagpasaeamat ag ana man gintaw-an it haega kung paano raya makabulig sa mga Akeanon.
“Batyag naton nga ginatatap gid kita it atong national government paagi sa Department of Migrant Workers,” hambae nana.
Ro nasambit nga pinansiyal nga bulig hay one-time immediate cash financial grant nga ginatao sa mga kwalipikadong benepisyaryo.
“Gina pasaeamatan gid naton ag gina kalipay ro raya ngara nga pag abot it bulig sa atong mga kasimanwa,” pagtao it importansya ni Quimpo.
Kaibahan rikara ro mga OFW nga nakabatyag nagkalisod ro pangabuhian bangud sa mga natural disaster ukon human-induced emergencies, mga biktima it human trafficking, ag iban pa nga indi manami nga mga sitwasyon.
Samantang, ginpasigurado ni Aligonza nga padayon nga makikipagbuligan ro DMW sa probinsya it Aklan para maipatuman ro mas maabong programa para sa mga OFW.
Ana gintaw-an it Importansya nga ro cash grant hay ginapasiguro nga ro mga benepisyaryo hay may pinansyal nga mabue-an agod makasarang ag makatindog halin sa andang pagkalisod.
“Bulig ina sang aton gobyerno para matagaan kamo sang pangabuhian niyo diri,” hambae ni Aligonza.
Ginpaathag mat-a ni Aligonza nga uwa gapareho ro bulig pinansyal sa kada OFW dahil raya hay nakadepende sa kaso ukon sitwasyon it OFW.
Sa idaeum it Department Order No. 05, series of 2024, ro standard nga kantidad it bulig, depende sa sitwasyon it mga natungdan nga OFWs ag andang pamilya, hay P50,000.00 hasta P75,000.00. (AGP/SQP/PIA Aklan)
