TAGBILARAN CITY, Bohol (PIA) — Gihangop sa Department of Energy (DOE) ang pagpakusog sa transmission line nga nagdugtong sa mga lalawigan sa Bohol ug Cebu, nga makatabang sa Bohol aron matubag ang nagkadako nga panginahanglanon sa kuryente ug makatabang pa sa kalihokan sa ekonomiya sa probinsya.
Ang Dumanjug-Corella 230 kV Line 1 ug Dumanjug 70 MVAR na-energize niadtong Hulyo 16, matod pa sa DOE.
Ang inisyal nga operasyon sa Cebu-Bohol 230 kV Interconnection Project, mahinungdanon sa Bohol, diin ang panginahanglanon sa kuryente nagkataas tungod sa pagdagsang sa mga turista sa probinsya, nga nailhan sa mga signature attractions nga mga white-sand beach ug diving spots nga mga lugar.
Kung mahuman sa katapusan sa 2024, ang proyekto gilauman nga makapauswag sa kasaligan nga suplay sa Bohol Grid pinaagi sa paghatag direkta nga pag-access sa daghang mga pasilidad sa koryente gikan sa Cebu, dugang sa kasamtangan nga Leyte-Bohol submarine cable.
Sa usa ka pahayag, gipasiugda ni DOE Kalihim Raphael Lotilla ang kamahinungdanon sa kasaligang enerhiya aron makamugna og dugang pang ekonomikanhong kalihokan ug makadani sa mga pamuhunan.
“Ensuring sufficient transmission capacity is crucial for the country’s economic development, as it promotes a reliable power supply that supports economic growth and investment,” matud pa ni Lotilla.
(Niini gipaseguro ang igo nga kapasidad sa transmission kay kini mahinungdanon alang sa pag-uswag sa ekonomiya sa nasud, tungod kay kini nagpasiugda sa usa ka kasaligan nga suplay sa kuryente nga nagsuporta sa pagtubo sa ekonomiya ug pamuhunan.) (ECB/PIA7-Bohol)
