CEBU CITY, Cebu (PIA) — Mipahinumdom ang Department of Energy (DOE) sa publiko nga sa pagsulod sa ting-init nga magdaginot na sa paggamit sa enerhiya o kuryente aron masiguro ang padayon ug kasaligan nga suplay sa tibuok nasud.
Sa press release, miingon si Energy Secretary Raphael P.M. Lotilla nga kung walay maayong pagplano sa paggamit sa kuryente, posible nga moresulta kini sa ‘power surge,’ nga mahimong hinungdan sa mga hagit sa suplay ug pagtaas sa presyo sa spot market.
Nahinumduman nga misaka ang demand sa kuryente tungod sa dugang nga paggamit sa makapabugnaw nga mga appliances sama sa air conditioners, electric fans, ug refrigerators.
Aron matabangan ang nasud sa pagmintinar sa lig-on ug kasaligan nga suplay sa kuryente, giawhag sa DOE ang tanang konsumidor—gikan sa mga kabalayan, pribadong establisyemento, ug mga institusyon sa gobyerno—nga mogamit og epektibo ug praktikal nga mga pamaagi nga dili makompromiso ang produktibidad ug operasyon.
Lakip sa mga lakang mao ang paglikay o pag-reschedule sa mga kalihokan nga nagkinahanglan og daghang kuryente. Ang maayong oras alang sa paggamit sa taas nga enerhiya mao ang gawas sa ‘peak hours’ nga gikan sa alas 11:00 sa buntag hangtod alas 3:00 sa hapon, Lunes hangtod Biyernes. Sa Sabado ug Domingo, ang ‘peak hours’ magsugod alas 11:00 sa buntag hangtod alas 3:00 sa hapon ug mobalik gikan alas 6:00 sa hapon hangtod alas 9:00 sa gabii sa Visayas ug Mindanao.
Giawhag usab sa DOE ang matag panimalay nga magpatuman og mga pamaagi sa pagdaginot sa enerhiya, sama sa pag-set sa air conditioner sa 24-26 degrees Celsius, paggamit og electric fan aron mapauswag ang sirkulasyon sa hangin, paggamit sa natural ventilation kung mahimo, ug regular nga pagmentinar sa mga appliances aron mas episyente kini.
Alang sa mga nagplano nga mopalit o mag-ilis og air conditioner o refrigerator, girekomendar sa DOE ang pagpili sa inverter-type models, tungod kay kini makatabang sa pagpugong sa sobra nga konsumo sa enerhiya ug pagpakunhod sa kusog nga paglihok sa kuryente pinaagi sa pag-adjust sa gikusgon sa compressor sumala sa panginahanglan.
Gawas sa pag-re-schedule sa high-energy-consuming activities, giawhag usab ang mga commercial ug industrial nga establisyemento nga mogamit og energy-efficient nga mga teknolohiya sama sa LED nga suga ug automated energy management systems.
Sumala sa demand forecast niining tuiga, gibanabana nga mokabat sa 3,111 megawatts (MW) ang peak demand sa Visayas, 14,769 MW sa Luzon, ug 2,789 MW sa Mindanao.
Sa pagkakaron, base sa Grid Operating Maintenance Program (GOMP) 2025-2027, ang maximum adjusted available generating capacity sa Visayas anaa sa 3,040 MW, hapit kapareho sa gibanabana nga demand karong tuiga.
Gawas pa niini, adunay bag-ong power projects nga anaa sa testing ug commissioning nga makadugang og 193 MW sa Visayas ug 1,890 MW sa Luzon.
Gipalig-on usab ang reserbang suplay sa enerhiya pinaagi sa capacity sharing nga 250 MW sa Luzon-Visayas ug 450 MW sa Visayas-Mindanao high-voltage direct current (HVDC) interconnections.
Mahitungod sa La Niña karong tuiga, gilauman nga makatabang kini sa pagpabugnaw sa temperatura sa tibuok nasud.
Bisan pa sa dugang ug mas lig-on nga suplay sa kuryente, gihatagan gibug-aton sa DOE nga kinahanglan ang hiniusang paningkamot sa pagdaginot sa enerhiya aron makab-ot ang malungtarong paggamit niini. (JJT/PIA7)
