TAGBILARAN CITY, Bohol (PIA) — Sa labing una nga higayon, gidala sa Department of Health 7 (DOH-7) ang ilang Caravan of Health Services alang sa Indigenous Peoples (IP) nga sakop sa tribu sa Ati sa Loay.
Ang 2024 IP Caravan of Health Services gipangunahan nila ni Dr. Nelner Omus, hepe sa Health Systems Development Sector sa DOH-7 ug ni Dr. Deab Eltanal, ang DOH -7 IP coordinator, naghatag sa mga Ati sa kahigayunan nga masinati ang libre nga mga serbisyo medical ug panglawas, nga lisud nga ikahatag sa usa ka LGU sama sa Loay.
Bitbit sa bahan nga gilangkuban usab sa 5 ka doctors, 7 ka mga dentist, mga nurse ug nursing volunteers nga iya sa lungsod sa Loay, lakip na ang pipila ka mga health advocates, ang pagpanghatag sa libreng serbisyo didto ipahigayun saulod sa Loay People’s Center diin gibanabana nga nakaabut na sa 200 ka banay nga Ati ug mga kaparyentehan niini ang nahatagan sa serbisyo.
Ang mga serbisyo nga naapil alang sa mga Ati sa Barangay Calvario ug Botoc, mao ang pagkuha sa vital signs, Operation Timbang, blood sugar ug glucose testing, health risk assessment, X-ray services, proper hygiene, dental hygiene, dental services and tooth extraction (ibot sa ngipon), health promotions labi na sa basic life support pinaagi sa Cardio Pulmonaty Resuscitation (CPR), libreng tambal, panghatag og maintenance nga tambal, antibiotics, tambal sa high blood, diabetes, antihistamine ug lakip na ang human immune virus testing u gang blood promotion.
Nakadawat usab ang mga Ati og mga hygiene kits ug mga delata, abag sa ilang panud-an, gawas pa nga ang LGU Loay, may giandam usab nga mga tabang sa mga sakop sa tribu.
Matud ni Eltanal, ilang giseguro nga ang mag serbisyo, haum usab sa panginahanglan sa mga Ati, kinsa labing unang higayon pa nga nakadawat sa Health Services Caravan.
Ug alang sa mga Ati, gipasabut sa mga tinugyanan sa DOH nga ang pagpakat-on sa mga pamaagi sa maayong bansay sa panglawas, makasakay sa kultura sa mag Ati ug nga kini dili supak sa ilang mga kinaiya ug gani, aron makatabang sa pagpatunhay niiining ilang pagka Ati.
Ang mga ato, saysay pa ni Carlos Hino Besida, 68 anyos ug tribal chieftain sa Ati nga nanimuyo sa Calvario Loay, 1970 pa sila nga ming-abut sa Bohol tungod sa panginahanglan nga makakaon.
Ang ilang mga kayutaan sa Isla sa Panay, matud pa niya, napalit sa mga adunahan ug gihimong mga katubohan, mao nga wala na silay kapuy-an.
Dinhi sa Bohol, sa ilang pag-abut sa Loay, nabati nila ang mainit nga pagdawat sa mga taga Bohol, bisan pa man nga mas hilig pa gihapon nila ang pagpangayam aron may makaon.
Gikan sa 10 ka banay nga kauban ni Besida sa iyang pagtapnas sa Bohol, may lain na usab nga komunidad sa mga Ati sa Botoc Oriental ug Occidental, nga karon nagkaminyoay na sa mga taga didto.
Dala sa kalisud usabs a ilang kahimtang ug s aka halayo sa ilang mga puy-anan, maglisud ang goberno sa pagtabang kanila sa ilang mga medical nga serbisyo nga ilang gipanginahanglan.
Tungod sa paghimo sa Caravan sa DOH, mapasalamaton usab si Vilma Pauden, chieftain sa Ati sa Botoc, tungod sa serbisyo nga gipakatag.
Sa kinaiya sa mga Ati, aduna man silay kaugalingon nga remedy sa simple nga ubo, sip-on ug hilanat, daku na gihapon og ikatabanga nga dili na kinahanglan pa nila nga mosuhot sa kasagbutan aron mangita sa tambal, tungod kay may nagtanyag ni niini kanila. (RAHC/PIA Bohol)
