SYUDAD SANG ROXAS, Capiz (PIA) — Tatlo ka mga Super Health Center kag duha ka Barangay Health Stations (BHSs) ang natapos na nga matukod sang Department of Health sa sini nga probinsya.
Samtang, may dugang pa nga lima ka SHCs kag tatlo ka BHS nga padayon nga ginpatukod base sa rekord sang DOH.
Pinaagi sa Health Facilities Enhancement Program (HFEP), tinutuyo sang DOH nga mas mapasanyog ang public health facilities sang pungsod.
Nahibaluan nga ang lima ka mga SHCs nga under construction ang sa Brgy. Sta. Fe sa banwa sang Pilar, Brgy. Badiangon sa banwa sang President Roxas, Brgy. Poblacion Ilawod sa banwa sang Panitan, Brgy. Pawa sa banwa sang Panay, kag sa Brgy. Najus-an sa banwa sang Mambusao.
Suno kay Reggie Joey Benliro nga OIC-municipal administrator sang banwa sang Pilar, magluwas sa mga kabarangayan sa Norte nga bahin sang banwa, ma-akomodar man sang SHC ang mga benepisyaryo sang national government housing project nga malapit sa lugar.
Ginsambit man sang administrador nga after sang construction sang SHC sa Brgy. Sta. Fe, may ara plano ang local government unit sang Pilar nga magpatukod sang “talipapa”, training center para sa mga persons with disabilities, kag substation sang police sa lugar.
“Mga walo ka barangay ang mas malapit sa Brgy. Sta. Fe kung ikumpara sa town proper nga mahimo akomodaron sang SHC. Maluwas sa mga barangay nga malapit, may community gid dira sang mga benepisyaro sang housing project nga may ara 1,535 ka pamilya,” dugang sini.
Sa pihak nga bahin, ginalauman man ni Punong Brangay Ed Baguio sang Brgy. Pawa sang banwa sang Panay ang SHC sa ila barangay.
Iya man ginpahayag nga apisar pa may ara sila barangay birthing clinic, wala sang regular nga midwife ang naga duty diri.
“Dako gid ang bulig sa amon kag sa mga malapit nga coastal barangays kay kung matapos na ang Super Health Center sa amon barangay, mas dasig na ang paghatag sang medical attention kag hindi na namon kinahanglan nga magkadto pa sa banwa,” dugang pa ni Baguio. (AGP/PLF/PIA Capiz)
