SYUDAD SANG ROXAS, Capiz (PIA) — Ginpangunahan ni Sec. Teodoro Herbosa sang Department of Health kag Gobernador Fredenil Castro sang probinsya sang Capiz ang pagbukas sang Bagong Urgent Care and Ambulatory Services (BUCAS) Center sang Enero 10 sa bago nga building sang Roxas Memorial Provincial Hospital sa Brgy. Lanot, Roxas City.
Ang BUCAS Center ang magahatag sang nagkalainlain nga mga out-patient nga mga serbisyo humalin alas 3:00 sa hapon tubtob alas 11:00 sa gab-i humalin Lunes tubtob Sabado sa bag-o nga RMPH.
Ginpahayag ni Sec. Herbosa nga ang center ang katumanan sang implementasyon sang Universal Health Care Act kag pagpakita sang nagapadayon nga pagtinguha sang gobyerno nga mapaabot ang mas accessible, masarangan sang tanan kag nagakaigo nga pag-atipan sa mga Pilipino.
Nahibaluan nga may 42 na nga nauna nga BUCAS Center sa Pilipinas matapos nga ginbuksan ang pinakauna nga kapareho nga proyekto sadtong Marso 6, 2024 sa Pampanga.
Ang duha sa mga sentro nga nabuksan ang ginplastar sa duha ka mga state university.
Gindugang pa sang opisyal sang DOH nga ang target sang ahensya nga mas mapadamo pa ang malab-ot sang BUCAS Center agud nga makaserbe sa 28 ka milyon nga mga pinakapigado nga mga Pilipino pag-abot sang tuig 2028.
Kadungan sa hilikuton ang “soft opening” sang 280-bed capacity nga bago nga RMPH. (AGP/AAL/PIA Capiz)
