NEGROS OCCIDENTAL (PIA) – Nagapadayon ang Department of Health (DOH) sa pag-analisar sa kalidad sang tubig sa mga barangay malapit sa bulkan Kanlaon sa banwa sang La Castellana agud masiguro nga matinlo ini kag mainom sang mga pumoluyo.
Nahibaluan nga bangud sang paglupok sang Kanaon sadtong Hunyo 3 nangin mahigko ang tubig bangud sang kontaminasyon sang asupre kag lahar.
Ginpahayag ni Raul Fernandez nga regional direktor sang Office of Civil Defense 6 kag chairperson sang Western Visayas Regional Disaster Risk Reduction and Management Council nga sa karon may isa ka DOH mobile filtration truck nga ginakuhaan sang matinlo nga tubig kag ginadala sa mga barangay sa La Castellana.
Gindugang pa ni Fernandez nga may mobile filtration truck man ang OCD apang ini ang ginkuha na gikan sa sa banwa sang La Castellana agud dal-on sa lugar nga nagakinahanglan sini.
“Antes kami naghalin sa La Castellana, ginpakita namon sa mga opisyales ang resulta sang water analysis kag nagbilin sang 10 ka tanke sang tubig agud mapunduhan sang mga pumoluyo.
Nahibaluan nga ginhingyo sang OCD ang bulig sang Department of Environment and Natural Resources (DENR) para masiguro ang egsakto nga nasakopan sang apat ka kilometro nga Permanent Danger Zone (PDZ) gikan sa bulkan para kuhaon kag isaylo sa luwas nga duog ang mga pamilya nga yara sa sulod sang PDZ.
Nakig-angot man ang OCD sa Department of the Interior and Local Government (DILG) bangud may mga pamilya nga nasandig ang palangbuhian sa agrikultura kag naghingyo man sila sang ayuda sa Philippine Army agud patigayunon ang seguridad sa sulod sang PDZ.
Suno kay Fernandez nakahanda sa ano man nga oras ang ila talatapan sa katalagman nga maabot paagi sa pagsunod sa sistema sang Regional Incident Management kon diin ginasunod man ang Unified Command System nga ginapamunuan sang isa ka incident commander. (AAL/Lljr/PIA6 Negros Occidental)
