TAGBILARAN CITY, Bohol (PIA) — Mipasidaan ang Department of Health (DOH) niadtong Lunes, Hulyo 8, sa publiko batok sa mga malisyosong tawo nga nagpakaaron-ingnong opisyal sa ahensya ug nangayo og mga donasyon.
Subay sa advisory sa DOH, matud pa, adunay mga indibidwal nga nagpakaaron-ingnon nga si Health Human Resource Development Bureau (HHRDB) Director Johanna S. Banzon.
Kini nga mga mangingilad naggamit sa mga mobile nga numero nga (0955) 7406258 ug (0935) 7892114.
“The DOH clarifies that these cellphone numbers are not, in any way, associated with the HHRDB or with Director Banzon.
(Giklaro sa DOH nga kini nga mga numero sa cellphone wala, sa bisan unsang paagi, kauban sa HHRDB o ni Direktor Banzon) matud pa sa advisory nga gipagawas sa ahensya ug nipasiugda nga ang maong mga
transaksyon naglangkob sa pagpanglimbong ug ilegal kini.
Gitumbok pa sa DOH nga ang mga kasong kriminal mahimong ipasaka batok sa mga naghimo sa maong mga aksyon.
Gisubli usab ang ilang pasalig sa pagdasig sa publiko sa pagkuha og impormasyon gikan lamang sa mga lehitimong tinubdan ug plataporma, sama sa opisyal nga link sa departamento sa panglawas ug social media. (ECB/PIA7-Bohol)
