SYUDAD SANG ILOILO (PIA) — Kasunod sang padayon nga pagtaas sang kaso sang Dengue sa bug-os nga rehiyon, liwat nga nagpanawagan ang Department of Health Western Visayas Center for Health Development (DOH WV CHD) sa mga lokal nga pangulohan sa pagpatuman sang mga estratehiya kontra sa mga lamok.
Sa isa ka virtual nga press conference, ginpakigbahin ni Dr. Bea Camille Natalaray, Medical Officer IV sang DOH WV CHD, nga humalin Enero 1 tubtob Pebrero 15 subong nga tuig nakalista ang rehiyon sang kabug-osan nga 1,703 ka mga kaso sang Dengue.
Suno kay Natalaray, ang ini nga mga kaso mas mataas sang 72 porsyento ikumpara sa mga nalista nga kaso sa kaparehas nga tion sang tinalikdan nga tuig nga yara sa 988.
Dugang pa sini nga kalabanan sa mga kaso ang nalista sa mga naga-edad isa tubtob 10 ka tuig nga nagabug-os sang 648 ukon 38 porsyento sang kabug-osan nga mga kaso kag ginasundan ini sang mga naga-edad 11 tubtob 20 anyos nga may 531 ka mga kaso ukon 31 porsyento.
Angot diri, ginhatagan importansya ni Natalaray ang pagpatuman sang mga lokal nga komunidad sang 5S strategy bilang epektibo nga pangontra Dengue.
Sang nagligad nga Pebrero 24, ginlunsar sang DOH ang “Alas Kwatro Kontra Mosquito,” isa ka aktibidad nga nasentro ang isa ka bahin sang 5S strategy nga naangot sa pagpangita kag pagguba (Search and Destroy) sang mga lugar nga mahimo pugadan sang mga lamok.
Sa idalom sang nasambit nga kampanya, ginahatagan punto sang ahensya nga kon wala sa lamok, indi man mahimo nga magdamo ang kaso sang dengue sa mga komunidad, ilabi na sa mga kabataan nga may pinakadamo nga kaso sang sakit.
Sa pagpanguna sang DOH, dululungan ang tanan nga mga ahensya sang gobyerno, opisina sa mga lokal nga pamunoan, kag ang bug-os nga komunidad sa pagtinlo sa takna nga alas kwatro sang hapon sa tagsa ka adlaw.
Apang, kabahin man sang 5S strategy ang paggamit sang “self-protection measures” kaaangay sang mosquito repellant kag pagsuksok sang malaba nga mga bayo, “seek early consultation” kon nagalain ang pamatyag, “support fogging” ilabi na sa mga lugar nga nadeklarar hotspot sang Dengue, kag “sustain adequate hydration” agod nga malikawan ang dehydration, ilabi na kon nagalain ang pamatyag.
Magluwas diri, ginahingyo man sang DOH ang mga lokal nga pamunoan para sa liwan nga pagtukod sang Dengue fast lane sa tanan nga mga health facilities sa bug-os nga rehiyon.
Humalin sang Enero subong nga tuig, nakaalokar ang DOH sang 23,690 Dengue combo test kits lakip sang iban pa nga mga kagamitan pangontra sa lamok kaangay sang larvicide, adulticide para sa fogging ukon misting, kag treated nets. (AAL/FRG/PIA6)
