DAVAO CITY, December 10 (PIA) — Nakigtambayayong ang Department of Health (DOH) sa mga media sa Mindanao alang sa health literacy sa paglikay sa mga sakit ug kadaot sa Apo View Hotel, Davao City niadtong Disyembre 4-6.
Giila ni Dr. Dominic Maddumba sa Health Promotions Bureau (HPB) sa DOH ang panginahanglanon nga makig-uban sa mga lokal na medya aron mas mapalapad ang pagpadala og tama nga impormasyon ug tukma na mensahe sa publiko.
“Importante po na alam ng ating mga media ang mga pangyayari sa kalusugan para maipaabot po natin ang tamang impormasyon sa ating mga kasama sa ating lipunan,” ingon ni Dr. Maddumba.
Sa maong conference, gihisgutan sa DOH, kauban ang mga kaubang non-government organizations, ang kabahin sa violence ug injury prevention programs sama sa Ligtas Christmas, road safety, drowning prevention, human immunodeficiency virus (HIV) / acquired immunodeficiency syndrome (AIDS), ug pagbakuna.
Anaa sa 25 ka mga medya gikan sa rehiyon sa Davao, SOCCSKSARGEN, ug Bangsamoro Autonomous Region of Muslim Mindanao (BARMM) ang mipartisipar sa tulo ka adlaw nga panagtapok.
“Kitang-kita po talaga na very interested and I hope that this will translate into very meaningful news na magagamit po ng ating mga kababayan,” suma pa ni Dr. Maddumba.
Gipadayag pud sa maong health promotions official nga aduna pay susama nga panagtapok ang pagahimoon aron maabot napud ang uban pang media practitioners.
“Without our media partners, hindi po magiging kumpleto ang aming communication framework dahil kayo po ang importante na source ng ating mga kababayan,” ingon niya. (MLU/PIA Davao de Oro)
