TAGBILARAN CITY, Bohol (PIA) — Nipagawas og pahimangno ang Department of Health (DOH) ngadto sa publiko kalabot sa mga online postings nga nagtanyag og peke nga Pre-Service Scholarship Programs (PSSP).
Kini ang pasidaan sa ahensya human nikatap ang post nga daw nag-advertise ug migamit sa logo sa DOH.
Gawas niini, nalatid usab sa maong post ang mga rekisitos sama sa good moral character, birth and medical certificate, barangay certification ug uban pang rekisitos aron makasulod sa nasangpit nga scholarship program.
Giklaro sa DOH nga dili na kini modawat og bag-ong scholars alang sa academic year 2024-2025.
Dugang sa DOH nga ang Pre-Service Scholarship Program gibalhin na usab ngadto sa Commission on Higher Education (CHED) ug ang CHED na ang adunay katungdanan sa paghatag og tabang ug suporta ubos sa maong programa.
Niadtong Hunyo 3, gipasidaan usab ang DOH sa publiko bahin sa mga panid sa Facebook nga malisyoso nga gigamit ang Malasakit Program Office ingon nga mga peke nga sentro sa pautang. (ECB/PIA7-Bohol)
