Pormal nang gi-turnover sa Department of Health ngadto sa Kagamhanang-Probinsyal ang ADB HEAL Projects ug DOH-HFEP Projects nga gi-implementar sa Department of Health sulod sa Zamboanga del Norte Medical Center, nga nahimutang sa Barangay Sicayab, ning Dakbayan sa Dipolog.
Ang mga gipang-turnover nga ADB HEAL Projects gilangkuban sa CT Scan, Protable X-Ray ug Patient Transport Vehicle ug DOH-HFEP Construction Projects nga gilangkuban sa Negative Pressure-Rooms Building, Doctor’s Lounge ug DOH Medicine Warehouse.
Lakip sa mga mitambong sa gipahigayong turn-over sa nasangpit nga proyekto sila si DOH Assistant Secretary Dr. Leonita P. Gorgolon, Mr, Richard Mugacha-Senior Project Manager sa United Nations Office for Project Sources, DOH-9 Assistant Regional Director Lenny Joy Rivera, Provincial Health Officer Dr. Eduardo Luayon, Executive Assistant IV Ms. Annabelle Jalosjos, ZNMC Chief of Hospital Dr. Ronelo Vergara, ZNMC Hospital Administrator Dr. Oswaldo Lamdag, Dr. Jane Jaug-DOH Provincial Head, ug Executive Assistant IV, Mr. Aurelio Monteclaro nga maoy mirepresentar ni Gov.Rosalina “Nanay Nene” Jalosjos sa maong okasyon.
Sa mensahe sa gobernadora nga gipaabot ni Mr. Monteclaro, si Gov. Jalosjos nagkanayon nga ang nasangpit nga mga proyekto maoy buhing kamatuoran nga magsiguro sa kaluwasan sa tanang Zanortehanon ilalom sa atong mga healthcare providers sa ZNMC.
Gipasalamatan usab ni Governor Jalosjos si DOH assistant secretary Gorgolon sa pagtabang nga masiguro ang kahumanan sa maong mga proyekto. Dugang pa sa gobernadora, nga ang commitment ni Asec. Gorgolon maoy nahimong hunungdan nga nadala dinhi sa atong lalawigan ang mga gikinahanglang kagamitan.
Labaw sa tanan, giila usab sa gobernadora ang sakripisyo ug kabudlay sa atong mga health workers nga anaa sa maayong panglawas ang atong mga kaigsoonan ug layo sa unsa mang balatian.
Sa iyang mensahe, gidayeg ni Asec. Gorgolon ang Kagamhanang-Probinsyal sa pagpanguna ni Governor Jalosjos sa hugtanon niining suporta sa tanang programa sa Department of Health dinhi sa lalawigan.
Matod pa ni Asec. Gorgolon, ang Zamboanga del Norte Medical Center mao ang usa sa unang 33 ka mga tambalanan nga nakapahimulos sa CT Scan nga gihatagan ug punto ni Asec. Gorgolon, nga ang suporta sa usa ka Local Government sa mga proyekto sa DOH maoy usa sa mga barometro o hinungdan nga ang maong mga proyekto dinhi napatuman sa Zamboanga del Norte.
Ang turn-over ceremony pormal nga gitak-op pinaagi sa pagpirma sa usa ka Memorandum of Agreement uban nila ni Aurelio Monteclaro nga mirepresentar ni Gov. Jalosjos ug Hospital Administrator, Dr. Oswaldo Lamdag ug sa pagblessing ni Rev. Fr. Philip Bryan Lumentac sa gipang-turnover nga mga proyekto. (PIC-ATRuda, with Rosella Aba-a and Jeffrey Lacay – Photographer)
