CAMIGUIN (PIA) — Aron matabangan ang mga persons deprived of liberty (PDLs) nga makab-ot ang bag-ong sinugdanan, ang Department of Labor and Employment (DOLE)-10 Camiguin Provincial Office naglunsad og entrepreneurship training ubos sa Integrated Livelihood Program (DILP).
Ang aktibidad nagtinguha nga matudluan ang mga PDL og mga kaalam ug kagamitan aron makapamaligya bisan pa sa sulod sa prisohan o pagbalik nila sa komunidad.
Gitagaan og bili ni DOLE-10 Camiguin Provincial Field Office Chief Arlyn Z. Bael ang kahinungdanon sa maong kalihokan, ug miingon, “DILP contributes to poverty reduction and reduces the vulnerability to risks of the poor, vulnerable, and marginalized workers either through emergency employment or promotion of entrepreneurship and community enterprises.”
(Ang DILP nakatampo sa pagpakunhod sa kapobrehon ug paghatag og kaayohan sa mga kabus pinaagi sa emergency employment ug pagpalambo sa panginabuhian ug komunidad.)
Ang maong pagsanay gipahigayon sa kauban sa Bureau of Jail Management and Penology (BJMP) ug gi-facilitate ni BJMP Camiguin Officer-in-Charge, Jail Inspector Rhett C. Estenzo. Gipahayag niya ang iyang pasalamat sa suporta nga gihatag sa DOLE, “Mapasalamaton mi sa DOLE kay gitagaan og higayon ug oportunidad nga makahatag og impormasyon nga posible makatabang sa atong mga priso.”
Ang pagsanay bahin sa padayong paningkamot nga mahatagan og lig-on nga panginabuhian ang mga PDL aron sa ilang pagbalik sa katilingban. Giingon ni Bael nga kini nga inisyatibo nagpalambo sa ilang ekonomikanhong kagawasan ug nagpaluyo usab sa mas lapad nga katuyoan nga malikayan ang balik-balik nga paglapas ug pagpalig-on sa kaayuhan sa komunidad. (DOLE-Camiguin/PIA-10/Camiguin)
