SYUDAD SANG ILOILO (PIA) — May kabilugan nga P5 ka milyon nga livelihood assistance ang ginhatag sang Department of Labor and Employment sa mga informal workers sa banwa sang Maasin sa Iloilo.
Ini ang ginalakipan sang P2 ka milyon para sa mga benepisyaryo sang Tulong Panghanapbuhay sa Ating Disadvantaged/Displaced Workers (TUPAD) program kag P3 ka milyon naman para sa livelihood support.
Ginhatag sang DOLE ang mga ayuda kadungan sa pagselebrar sang munisipalidad sang Maasin sang ika-106 sini nga Founding Anniversary sang Hulyo 25.
Samtang sa iya mensahe, ginpasidunggan ni Atty. Sixto T. Rodriguez, Jr. nga direktor sang DOLE 6 ang kooperasyon sang “Maasinanons” sa pagpaumwad sang ila banwa humalin sa mga nagligad nga mga tuig.
Personal man nga ginhatag sang opisyal sang DOLE 6 ang tseke kay Mayor Francis A. Amboy sang Maasin.
Ang bulig nga ginhatag ang kaangot man sa direktiba ni Sec. Benny E. Laguesma sang DOLE nga dal-on ang gobyerno palapit sa mga pumuluyo, ilabi na gid ang yara sa laylayan nga ginakonsiderar bilang unserved, underserved, kag hard-to-reach nga mga sektor sang sosyedad, ang pahayag ni Rodriguez.
Iya man ginpakigbahin ang iya nabatyag sa okasyon kung sa diin ini ginkabig man para balikan ang mga kadalag-an, paghangkat, kag iban pa nga mga plano para sa pagpa-uswag sang munisipalidad.
Nagpanawagan man si Rodriguez nga mangin kabahin sang pagbag-o ilabi na gid sa pagbato sa kaimulon pinaagi sa paggamit sing husto sang mga programa kag serbisyo sang gobyerno.
“Mga abyan, ang husto nga social justice makita sa aksyon, hindi lang ini legal nga prinsipyo,” dugang pa ni Rodriguez sa pulong nga Iningles.
Mahibal-an nga sang tuig 2023, ang DOLE 6 naghatag man sang P1.8 milyon nga bulig sa Maasin Bamboo Association para sa produksyon sang kalidad nga bamboo handicrafts kag furniture nga makalinya man sa global standards kag mapreserbar ang kinaiya sang mga Maasinanon sa pagbuhat sang bamboo handicrafts. (AAL/AGP/PIA 6 with reports from DOLE 6)
