MAMBAJAO, Camiguin (PIA)–Gipakita na usab sa Department of Labor and Employment (DOLE) Camiguin Provincial Office ang ilang pasalig sa paghatag gahum sa mga komunidad og pagbayaw sa kinabuhi pinaagi sa paghatag ug P365,000 nga balor sa livelihood assistance ngadto sa 15 ka benepisyaryo pinaagi sa DOLE Integrated Livelihood Program (DILP).
Ang turnover ceremony, nga gipahigayon sa Mambajao, nagtimaan sa usa ka mahinungdanong milestone sa misyon sa departamento sa paghupay sa kakabos ug paghatag og malungtarong panginabuhian ug mga kahigayunan sa panarbaho sa mga residente sa Camiguin.
Lakip sa mga panginabuhian nga gisuportahan mao ang produksyon sa siomai, bibingka, ug empanada making, native chicken production, food vending, makeup ug hairstyling services, frozen food meat processing, sari-sari store, kakanin snack making, barber shop, rice retailing, cake ug pastry making, ug mga serbisyo sa pagmasahe.
Si Orlando Abrenica sa DOLE-10 mihatag og gibug-aton sa kamahinungdanon niini nga mga inisyatiba, nga nag-ingon, “We believe that empowering individuals with sustainable livelihoods not only helps uplift their families but also contributes to the overall economic growth of the community [Kami nagtuo nga ang paghatag gahum sa mga indibidwal nga adunay malungtarong panginabuhian dili lamang makatabang sa pagbayaw sa ilang mga pamilya apan makatampo usab sa kinatibuk-ang pagtubo sa ekonomiya sa komunidad].”
Si Marilou Guinitaran, usa ka benepisyaryo gikan sa Poblacion, Mambajao, nipadayag sa iyang kinasingkasing nga pasalamat nga nahimong kabahin sa programa.
“Dako gyud ni og natabang kay mao ra man gyud ni among panginabuhian, kanang empanada labi na karon nga nadungagan pa gyud among materials ug among mga ingrediente nga gihatag sa DOLE. Nagpasalamat gyud ko og dako,” ingon niya.
Para kang Marilou ug sa uban pang mga nakadawat, kini nga tabang nahimong usa ka makapabag-o nga higayon aron matuman ang ilang mga damgo. Daghan ang nangandoy nga makatukod ug kaugalingon nilang mga negosyo apan kulang sa gikinahanglang pinansyal nga suporta.
Uban sa interbensyon sa DOLE, kini nga mga nagtinguha nga mga negosyante makahimo na sa mga mahukmanon nga lakang padulong sa kaugalingon nga katagbawan ug kagawasan sa ekonomiya.
Ang turnover ceremony sa Mambajao usa ka testamento sa dili matarug nga dedikasyon sa DOLE sa pagmugna og mas hayag nga kaugmaon sa mga residente sa Camiguin.
Pinaagi sa pagpausbaw sa pagsalig sa kaugalingon ug pagdasig sa mga gagmay nga negosyo, ang departamento nagtumong sa pagbatok sa kakabos sa mga gamot niini ug paghatag og dalan alang sa mas mauswagon nga komunidad, matud ni DOLE Camiguin Provincial Director Arlyn Bael.
Ang mga paningkamot sa DOLE labaw pa sa tabang pinansyal; naghatag sila og komprehensibo nga suporta, lakip ang pagbansay ug mga programa sa pagpalig-on sa kapasidad, aron pagsangkap sa mga benepisyaryo sa gikinahanglang kahanas ug kahibalo alang sa ilang gipili nga panginabuhian. (RTP/PIA-10/Camiguin)
