SYUDAD SANG ILOILO (PIA) — Nagasakay na sa karon sa Negosyo sa Kariton ukon “Nego-Karts” ang mga nagabolante nga sadto nagabaligya samtang nagapanaw lang, matapos nga makabaton sang bulig halin sa Department of Labor and Employment (DOLE) Western Visayas.
Ang DOLE Western Visayas, kaupod ang Iloilo City Government, naghatag sang 133 ka Nego-Karts sa idalom sang Negosyo sa Kariton nga proyekto nga tinutuyo nga protektahan ang mga nagabolante kag makahatag sa ila sang mobility.
Maluwas sa Nego-Karts, 100 ka mga kababainhan nga mga benepisyaryo ang nakabaton sang inputs para sa sari-sari store project. Ang livelihood assistance naglab-ot sa P6.8 milyon, nga ginalantaw nga pataason ang kondisyon pang-ekonomiko sang mga benepisyaryo nga mga babayi, persons with disabilities, senior citizens, kag mga nagabolante.
Sa ginpatigayon nga turn-over ceremony, ginpahayag ni DOLE Iloilo Field Office head Joselito G. Dela Banda ang mensahe ni DOLE director Sixto T. Rodriguez, Jr. nga nakasentro sa pagpamatok sa kaimulon paagi sa paghatag sang palangabuhian.
Ginpunto man ni Rodriguez ang importansya sang women empowerment kag equality.
Ang livelihood assistance suno kay Rodriguez ang kabahin man sang adbokasiya sang ahensya sa pag-empower sang mga kababainhan kasubong nga nagpasakop ini sa selebrasyon sang National Women’s Month sang nagligad nga Marso. (AAL/AGP kalakip ang mga balita halin sa DOLE Western Visayas)
