TAGBILARAN CITY, Bohol (PIA) – Nagpahinumdom ang Department of Labor and Employment (DOLE) sa mga employers kalabot sa hustong pagbayad sa sweldo sa ilang mga empleyado sa ika- 39 nga anibersaryo sa EDSA People Power 1 sa umaabot nga Pebrero 25.
Gipagawas sa DOLE ang pay rules alang sa maong adlaw pinaagi sa Labor Advisory 2, s. 2025, nga gilagdaan ni DOLE Kalihim Bienvenido Laguesma, agi og pagsunod sa Proclamation 727, s. 2024, nga nagdeklara sa EDSA 1 isip special working day sa nasud.
Nakalatid sa pay rules nga ang maong adlaw gi-konsidera nga ‘ordinary working day’ alang sa tuyo nga pagbayad sa ‘wages and wage-related benefits’ sa mga empleyado.
Kun ang usa ka empleyado dili motrabaho sa maong adlaw, ipatuman ang ‘no work, no pay,’ gawas na lamang kun adunay paborableng company policy, practice, o collective bargaining agreement (CBA) nga maghatag og bayad sa usa ka special working day.
Kun mosulod sa trabaho sa maong adlaw ang empleyado, angay siyang bayran sa iyang employer og 100 porsyento sa iyang sweldo alang sa maong adlaw sa unang walo ka oras o Basic wage x 100 porsyento.
Samtang kun mag-overtime ang empleyado o motrabaho og lapas sa walo ka oras, angay siyang bayran sa iyang employer og dugang 25 porsyento sa iyang hourly rate sa maong adlaw o Hourly rate of the basic wage x 125 porsyento.
Ang EDSA People Power Revolution, nga nahitabo niadtong Pebrero 25, 1986, nagpabilin nga usa ka makahulogan sa kasaysayan sa Pilipinas nga nagsimbolo sa malampuson nga pagbalik sa demokrasya sa nasud. (ECB/PIA7-Bohol)
