Photo courtesy of DOLE Western Visayas
SYUDAD SANG ILOILO (PIA) — Nagsaulog ang Department of Labor and Employment (DOLE) sa Western Visayas sang 2025 World Day for Safety and Health at Work diri, Abril 28, kung sa diin ginasakdag ang paghibalo sang mga aksidente nga may kaangtanan sa trabaho kag mga konsekwensya, kon sa diin ginhatagan pagtamod ang pagbutang sang kaluwasan sa ubra kag ikaayong lawas sa internasyonal kag nasyonal nga agenda.
Kapin sa 60 ka safety officers, mga tiglawas gikan sa safety organizations, Gawad Kaligtasan at Kalusugan (GKK) awardees, Employees’ Compensation Commission, National Conciliation and Mediation Board, kag Occupational Safety and Health (OSH) Center ang nagtambong sa aktibidad.
Sa iya mensahe, ginpunto ni DOLE Regional Director Sixto T. Rodriguez Jr. ang mandato sang the DOLE nga protektahan ang kinamatarong kag kaayuhan sang mga nagatrabaho kag para masiguro ang kaluwasan kag ikaayong lawas samtang nagaubra, amo man ang pagsunod sang mga employer, nga nasandig sa Book IV sang Labor Code.
Ginpanawagan man ni Rodriguez sa tanan nga health and safety advocates nga batunon ang mga paghangkat kag kuhaon ang mga oportunidad sa pagpasangkad sang artificial intelligence (AI) kag digitalisasyon sang kaluwasan kag ikaayong lawas sa ubra.
“As we embrace these advancements, it’s imperative to ensure they serve to protect and empower every worker,” suno sa iya.
Ginpalig-on man sang direktor ang labor force nga magkomiter nga himuon ang mga ulubrahan bilang nagakaigo nga mga hulot nga may seguridad kag lakip ang tanan.
“Let us commit to a future where technology and humanity collaborate to create safer, healthier, and more inclusive work environments. Together, we can harness innovation to uphold the dignity and safety of all,” dugang pa niya.
Nahisuno sa hilikuton, ginhatagan sang Plaque of Recognition ang mga nagdaog sa 2024 Gawad Kaligtasan at Kalusugan (GKK) nga amo ang mga masunod: Panay Energy Development Corporation, Negros Island Solar Power Corporation, Inc. Petron Corporation, Guimaras Wind Corporation, kag Palm Concepcion Power Corporation.
Nagpirma man ang mga partisipante para sa United for Zero Accidents: A Call-to-Action covenant signing.
Nagpakigbahin naman sang ila best practices sa OSH sanday engineer Eliezar A. Ramos sang Panay Energy Development Corporation kag Anton P. Montinola sang Negros Island Solar Power Corporation.
Sa pihak nga bahin, naghiwat man sang lektyur sa digitalisasyon kag artificial intelligence sa kaluwasan kag ikaayong lawas si Ma. Joan S. Dionela, president sang Rethink Safety, Inc.
Suno sa DOLE, ang 2025 World Day for Safety and Health at Work isa ka United Nation celebration nga nagahatag pagtamod sa luwas nga trabaho. (AAL/AGP/PIA 6 kalakip ang mga balita gikan sa DOLE Western Visayas)
