SYUDAD SANG ILOILO (PIA) – Ginpresentar sang Department of Science and Technology – Philippine Council for Health Research and Development (DOST-PCHRD) ang mga panalawsaw sa marine biodiversity sang Pilipinas nga nagatuyo masabat ang mga kritikal nga isyu sa panglawas sa ginhiwat nga Talakayang HeaRT Beat press conference sang Nobyembre 13, 2024 sa Iloilo City
Ang kahiwatan nagpakita sang tatlo ka importante nga mga inisyatibo sa pagpanalawsaw nga nagausisa sang paggamit sang mga manggad sa dagat para maghatag solusyon sa problema sa ikaayong lawas, lakip ang pagtukib sang antibiotic para sa pagtapna sang kanser, kag paghimo sang functional food.
Suno sa DOST-PCHRD ang in inga mga pagtuon nga ila ginasuportahan nagatuyo nga makabulig sa estado sang ikaayong lawas sang tanan kag makaamot sa pangkalibutanon nga mga panikasog sa pagpakig-away sa antimicrobial resistance, cancer, kag iban pa nga chronic conditions.
Isa sa mga ginpresentar nga panalawsaw sa press conference amu ang USA-TLC Phase II project sang University of San Agustine nga nagasentro sa paghimo sang antibiotics and anticancer agents halin sa Philippine marine Streptomyces. Ini nga mga bakterya may ara sang bioactive compounds nga may potensyal nga magamit sa medisina.
Samtang, ang pagtuon naman sang grupo ni Hilario S. Taberna Jr. gikan sa Iloilo Science and Technology University (ISAT-U), naga-usisa sang mga benepisyo sa ikaayong lawas sang mga wine nga gikan sa lokal nga mga seaweeds.
Naisipan sang mga researcher sa buluthuan nga gamiton ang seaweed sa pag-ubra sang wine bangud bugana ini sa isla sang Panay kag puno sang bitamina, mineral, kag iban pa nga mga bioactive compounds rason agud tawgon nga ‘Medical Food of the 21st Century’.
Naggwa sa panalawsaw sang ISAT-U nga ang ila seaweed wine, 2-7 ka beses nga mas epektibo pinanggid sa iban nga mga anti-diabetic wine, may mas mataas nga antioxidant capacity pinaanggid sa mga commercial grape wine, kag may mga compound nga may anti-inflammatory, anticancer, kag antihyperglycemic nga mga kinaiya.
Ang ikatlo nga pagtuon amo ang Functional Food Program on Philippine Seaweeds nga isa ka kolaborasyon sa tunga sang DOST Food and Nutrition Research Institute (FNRI) kag Cebu Technological University.
Ini nga pagpanalawsaw naga-usisa sang komposisyon sang nutrisyon kag mga benepisyo sa ikaayong lawas sang nagkalainlain nga mga species sang edible seaweeds nga makita sa Pilipinas. Ang pagtuon nagatutok sa antioxidant, anti-diabetic, kag anti-inflammatory properties sang seaweeds. (AAL/JNH/PIA Iloilo)
