ILIGAN CITY (PIA) — Nagapadayon ang Department of Science and Technology (DOST) sa pagpasiugda og mga inisyatibo sa pagpalig-on sa siyensya, teknolohiya, ug inobasyon, nga magsilbing tinubdan sa paglambo sa ekonomiya ug magmugna og mga trabaho para sa mga Pilipino.
Sa usa ka zonal conference nga gipahigayon sa Mindanao State University – Iligan Institute of Technology (MSU-IIT), miingon si DOST Secretary Renato Solidum Jr. nga ang tinuod nga kausaban magagikan sa pag-commercialize sa mga inobasyon, aron kini magamit sa tanan. Iyang gipasabot nga ang pagsulbad sa mga problema ug pagpalambo sa negosyo pinaagi sa teknolohiya makatabang sa ekonomiya ug magdala og mga oportunidad para sa mga tawo.
“Parating binabanggit ng ating pangulo sa mga exhibition nating ginagawa na kailangang ma-scale up ang ating innovation, at ‘yan ay sa pamamagitan ng commercialization. Sa larangan ng innovation ng mga technology natin, syempre, ang gusto nating mangyari ay makinabang ang ating mga kababayan,” sumala niya.
Gipresentar sa DOST ang tulo ka importante nga mga programa, ang Science, Technology and Innovation for Sustainable Development Goals (STI for SDGs), Pagtanaw 2050, ug ang Program PROPEL.
Ang Program PROPEL naghatag og mga serbisyo nga makatabang sa mga inobasyon sa mga Pilipino ug mapaabot sa global nga merkado. Kini maghimo og mga kolaborasyon tali sa mga negosyo, pamuhunan, ug industriya aron mapalig-on ang mga inobasyon sa nasud.
Samtang ang Pagtanaw 2050 nag-andam sa mga lider ug mga policy-maker alang sa mga umaabot nga kalisdanan pinaagi sa strategic foresight. Samtang ang STI for SDGs nga nagtan-aw sa papel sa teknolohiya sa pag-sulbad sa mga problema sa kalibutan sama sa kapobrehon ug kalikupan.
Gibutyag ni MSU-IIT Chancellor Alizedney Ditucalan nga ang suporta sa DOST sa research ug development sa unibersidad dako kaayo ug importante sa pagpahigayon sa ilang mga inobasyon. Gipakita usab sa MSU-IIT ang ilang inobasyon, ang InfraspeX, nga naggamit og drones ug artificial intelligence aron mapaayo ang proseso sa inspeksyon sa mga tulay ug kalsada. (LELA/PIA-10/Lanao del Norte)
