ILIGAN CITY (PIA) — Gidala sa Department of Science and Technology – Philippine Atmospheric, Geophysical and Astronomical Services Administration (DOST-PAGASA) ang ilang Mobile Planetarium sa Northern Mindanao Regional Innovation Program and Exhibit (NorMinRIPE) 2025, nga nakadani sa interes sa mga estudyante ug mga science enthusiasts.
Ang inflatable dome nagpakita og 3D-like nga projections sa mga bitoon, planeta, ug uban pang celestial bodies, nga naghatag sa mga partisipante og mas duol nga tan-aw sa mga kahibulongang bahin sa uniberso.
Sumala ni Prince Wilson Au, Officer-in-Charge sa Mindanao PAGASA Regional Services Division (MPRSD) Planetarium nga naa sa Molugan, El Salvador City, tumong sa mobile planetarium nga mapalapad ang kasayuran ug pagsabot sa astronomy sa katawhan.
“Mas ma-widen ang area nga makabalo og astronomy. We use mobile planetarium para maghatag og knowledge about astronomy,” matod niya.
Dugang niya nga ang mobile setup naghatag sa parehas nga educational value sa usa ka fixed planetarium ug gi-butyag nga ang gamit niini nagpahimo sa learning experience nga portable ug accessible.
Busa, nalipay ug mapasalamaton si Christopher Erl Almendras, usa ka estudyante sa programa sa customs gikan sa Lyceum Iligan Foundation. Nalipay siya nga maka-experience sa mobile planetarium sa unang higayon.
“Gusto kong maexperience kung anong meron sa loob, gusto ko makita kung anong andon sa loob. Di pa kasi ako nakatry,” sumala niya.
Ang ubang interesado mahimo usab bisitahan ang fixed planetarium sa MPRSD nga naa sa El Salvador City, Misamis Oriental, nga mao ang pinakaunang planetarium sa Mindanao. Ang pasilidad naglakip sa usa ka dako nga dome-shaped nga projection theater nga nagpakita sa mga constellations, planeta, ug uban pang astronomical phenomena, ug naglakip usab sa gallery hall, usa ka astronomical observatory, ug usa ka conference room. Gidisenyo kini alang sa edukasyon ug kalingawan, nga naghatag og upat ka mga sesyon kada adlaw: 9:00 – 10:00 AM, 11:00 – 12:00 NN, 1:00 – 2:00 PM, ug 3:00 – 4:00 PM. (LELA/PIA-10/Lanao del Norte)
