SYUDAD SANG ROXAS, Capiz (PIA) — Ginpangunahan ni Sec. Christina G. Frasco sang Department of Tourism (DOT) ang paghatag sang tour guiding kits sa 16 ka mga local tour guide sang damlag lang sa banwa sang Panay bilang kabahin sa pagbulig sang ahensya sa mga frontliners sang industriya sa turismo.
Subong man ginpaabot ni Frasco ang libre nga accident insurance coverage nga nagabalor P50,000.00 sa mga tour guides.
“Ang aton pagpasidungog kag pagkilala sa mga frontliners sang industriya nga nagasakripisyo tagsa ka adlaw agud nga ang mga atraksyon kag destinasyon handumon kag magapabilin sa tagipusuon subong man panumduman sang mga bisita kag turista,” ang pahayag ni Frasco.
Ang tagsa ka kit ang ginalakipan sang kalo’, electronic lapel microphone, sunblock, tumbler kag madamo nga iban pa nga magamit sang mga benepisyaryo sa ila tagsa ka adlaw nga pag-serbisyo.
“Maraming salamat po sa pagbibigay-halaga sa aming mga pangangailangan as service providers,” ang pahayag sang tour guide nga si Dino Rene Altobano sa nabaton nga kit.
Samtang kaupod sang Secretary sang DOT sa nasambit nga hilikuton amo ang mga opisyal sang probinsya kag banwa sang Panay kag iban pa nga mga bisita nagikan sa DOT.
Nahibaluan nga ang opisyal sang gabinete ni Pangulong Ferdinand R. Marcos, Jr. ang nagpanguna man sa groundbreaking kag pagpirma sang Memorandum of Agreement para sa implementasyon sang P12-milyon nga “Panay: A Coastal Resource Experience” nga proyekto nga nadaog sang lokal nga panguluhan sang Panay sa Tourism Champions Challenge nga inisyatibo sang DOT kag Tourism Infrastructure and Enterprise Zone Authority (TIEZA). (AGP/AAL/PIA Capiz)
