SYUDAD SANG ILOILO (PIA) — Mas luwas na sa katalagman sa dalanon nga makapadulong sa mga kabanwahanan sang Leon kag Alimodian, Iloilo bangud sa padayon nga pagtukod sang slope protection structures sang Department of Public Works and Highways (DPWH) 6.
Sang damlag lang, ang DPWH Iloilo 4th District Engineering Office nagtukod sang isa pa ka slope protection structure sa may Junction Bancal-Leon-Antique Boundary Road, nahamtang sa Barangay Ayabang sa may banwa sang San Miguel.
Suno kay DPWH 6 Regional Director Sanny Boy O. Oropel, ang nasambit nga estruktura magasiguro nga ang dalan kag ang mga malapit nga komunidad mapalayo sa mga posible nga katalagman dala sang landslide kag nagadagdag nga mga debris.
“This portion of the national road is very susceptible to landslide and rock fall especially when heavy rains occur, posing danger to commuters and residents, hence, this improvement is significant in order to preserve the life and properties of the people living in the area,” pagpa-athag ni Oropel.
Dugang pa diri, ang slope protection magasiguro man nga ang dalan mangin accessible sa tanan nga ti-on, tayuyon ang transportasyon ilabi na sang mga produkto pang-agrikultura halin sa kaumahan padulong sa mga merkado.
Suno pa gid kay Oropel, ang slope protection magapasilidad sang mas madasig nga pagdul-ong sang serbisyo-medikal sa mga pumuluyo gikan sa mga malayo pa nga lugar.
Dugang naman ni District Engineer Mario G. Soriano, ang slope protection magahatag man sang mas masulhay nga access sa nagkalainlain nga tourist destinations sa lugar.
Siling ni Soriano, mahibal-an nga ang nasambit nga road section nagahatag sang access padulong sa Bucari Pine Forest sa Brgy. Bucari, Leon nga ginakonsiderar bilang “Little Baguio” sang probinsiya sang Iloilo kag amo man sa tourist destinations sa banwa sang Alimodian kaangay sang “Imoy Falls” kag “Seven Cities” nga kilala sa ila organic vegetable production.
“We should ensure that our national roads especially those in the highland areas are free from falling debris and erosion to provide smooth and continuous flow of traffic, especially these days that we are experiencing series of rainfall,” dugang pa ni Soriano.
Ang P96.496-milyon nga proyekto ginpondohan sa idalom sang FY 2023 Regular Infrastructure Program. Ini nagalakip sang pagtukod sang slope protection structure kag drainage system, dala na ang pagpatukod sang tulay kag iban pa nga miscellaneous structures. (AAL/AGP/PIA 6 kalakip ang mga balita gikan sa DPWH 6)
