CATARMAN, Camiguin (PIA) — Aron mapalambo ang kahilwasan, pagka-accessible, ug kahandam sa katalagman sa lungsod, ang probinsyal nga gobyerno sa Camiguin ug ang Department of Social Welfare and Development (DSWD)-10 naghatag og bag-ong mga imprastraktura sa lungsod sa Catarman, lakip ang 78 ka solar-powered street lights ug ang bag-ohay lang nahuman nga Panghiawan Evacuation Center, Enero 31.
“Malipayong gidawat sa katawhan kining mga imprastraktura isip dakong tabang nga maghatag kahayag, kasiguruhan, ug kaandam panahon sa emerhensiya, samtang naghatag usab og mas sayon nga access sa mga kasilinganang barangay,” matod ni Gob. Xavier Jesus Romualdo.
Gipasiugda niya ang pasalig sa gobyerno sa pagpatuman sa mga inisyatiba nga makapahapsay sa publiko, makapadugang sa kahilwasan, ug makapalambo sa kinatibuk-ang kalamboan.
Ang pagbutang sa 78 ka solar-powered street lights naglakip sa daghang barangay sa Catarman, diin ang Barangay Panghiawan maoy nag-unang dapit kauban ang Alga, Bonbon, Bura, Catbac, Compol, Lawigan, Lloan, Looc, Mainit, Manduao, Poblacion, Sto. Niño, ug Tangaro.
Ang maong proyekto adunay kinatibuk-ang kantidad nga P7.5 milyon nga gikan sa grant sa Kapit-Bisig Laban sa Kahirapan-Comprehensive and Integrated Delivery of Social Services (KALAHI-CIDSS), nga adunay kontribusyon ang komunidad nga P10,000. Ang pag-instalar nagsugod niadtong Nobyembre 15, 2024, ug gilauman nga mahuman sa Pebrero 13, 2025.
Nakadawat usab ang komunidad sa Panghiawan Evacuation Center, nga magamit isip luwas nga kapuy-an sa mga residente panahon sa katalagman. Ang maong proyekto nahimong posible pinaagi sa panag-uban sa komunidad, lokal nga gobyerno sa Panghiawan, Barangay Development Council-Technical Working Group, ug Lokal nga Gobyerno sa Catarman.
Kini nahuman niadtong Disyembre 23, 2024, nga adunay kinatibuk-ang kantidad nga P10 milyon, nga gikan sa DSWD-KALAHI-CIDSS grant, samtang ang MLGU mitabang pinaagi sa in-kind nga kontribusyon nga P50,000.
Kini nga mga proyekto gipatuman ubos sa KALAHI-CIDSS Kapangyarihan at Kaunlaran sa Barangay (KKB) Community-Driven Development Program sa DSWD, nga nagpasiugda sa participatory nga pamaagi sa lokal nga kalamboan.
“Ang CDD Bill nagtanyag nga gamitong usa ka nasyonal nga stratehiya ang Community-Driven Development (CDD) approach, usa ka development strategy kon asa gipanghingusgan ang partisipasyon sa katawhan sa pag-ila sa mga problema sulod sa komunidad ug pagmugna sa solusyon niini pinaagi sa mga proyektong ipatuman sa lokalidad,” matod ni DSWD-10 Assistant Regional Director for Administration Salmah Basher.
Mapasalamaton sa pagtukod sa evacuation center sa ilang dapit, si Barangay Kapitan Romulo Siga miingon, “Dako kaayo og tabang sa barangay ilabina sa panahon sa mga kalamidad. Kini magamit namo para sa preemptive evacuation sa mga pamilya nga duol sa dagat ug naa ilawom sa kalubihan sanglit ang Panghiawan daplin sa dagat ug daghan pod nga tanom nga mga lubi.”
Dugang niya nga panahon sa katalagman, magamit ang evacuation center ug mahimo usab kini gamiton alang sa Pantawid Pamilyang Pilipino Program (4Ps) family development sessions (FDS), ingon man mga miting sa mga mananagat, senior citizens, mag-uuma, kababayen-an, ug kabatan-onan sa barangay.
“Ang solar street lights dako kaayo og tabang sa community tungod kay sa ka gamay sa NTA (national tax allotment) sa barangay lisod mabutangan sa barangay street lights ang atong mga kadalanan kay layo sa poste sa kuryente. Sa pagkakaron, hayag na ang atong mga barangay roads tungod sa solar street lights ug dli napod hadlok kung maglakaw ang mga taw sa atong barangay kay hayag na,” matod ni Siga.
Usa sa mga residente, si Mary Grim Lumacang, mipahayag usab sa iyang pasalamat sa mga nagpatuman sa proyekto, nga miingon, “Ang Evacuation Center naay ma adtoan ang mga residente kung ingkaso naay mga katalagman nga nahitabo sama sa sunog, bagyo og uban pa og ang solar lights nga maoy gahatag og kahayag para kini sa seguridad sa mga tao nga mag-agi sa gabii labi pa kay ngitngit ang maong dapit og minus kaayo og mga balay.”
Si Gob. Romualdo, Rep. Romualdo, Basher, ug Catarman Mayor Kiterio Antonio Palarca II nanguna sa turnover ceremony, uban sa mga opisyal sa barangay ug ubang stakeholders. (RTP/PIA-10/Camiguin)
