SYUDAD SANG ILOILO (PIA) – Liwat nga ginklaro kag ginpasalig sang Department of Social Welfare and Development (DSWD)-6 ang publiko nga wala sang otoridad ang mga politiko para kakason sa listahan ang mga benepisyaryo sa mga programa sang ahensya.
Ini ang ginklaro sang DSWD-6 matapos naggwa ang mga pahayag nga may ara sang iban nga mga politiko nga nagapamahog sa mga pumuluyo nga pang-kakason ang ila pangalan sa lista kon indi sila magsuporta sa mga partikular nga kandidato.
Suno kay DSWD-6 director Arwin O. Razo, nagapabilin nga non-political ang ahensya kag sila lang ang may ikasarang nga magdugang ukon kakas sang mga benepisyaryo sa ila mga programa basi man sa mga pagsulundan.
“Only DSWD can delist you from our programs and projects and removal can only be done for valid cause. If you are threatened of being removed from our programs because you are not supporting a certain candidate, that is a lie. We do not do that. We remain non-political,” pahayag ni Razo.
“Rest assured that our programs are insulated from politics. Politicians cannot remove our beneficiaries,” dugang pa ni Razo.
Ginpahayag man sang ahensya nga ang listahan sang Pantawid Pamilyang Pilipino Program (4Ps) ang nakasandig sa ila Listahan database nga ila ginadumala nga wala sang impluwensiya sang mga politiko.
Sandig sa patakaran sang DSWD, malakip sa 4Ps ang isa ka pamilya kung ini makabig nga “poor” or “near poor” basi sa poverty threshold sang Philippine Statistics Authority (PSA), may kabataan nga 0 to 18 years old, ukon may miyembro nga nagabusong sa tiun sang pagrehistro.
Ginpahayag man sang DSWD-6 nga ang ila Social Pension Program nakabasi sa Listahan database kag may pagsulundad nga ginasunod, kung sa diin ang mga benepisyaryo dapat naga-edad 60 anyos pataas; maluya, masakiton, ukon may kasablagan; wala sang may ginabaton nga pension sa GSIS, SSS, Philippine Veterans Affairs Office (PVAO), Armed Forces and Police Mutual Benefit Association, Inc. (AFPMBAI), ukon iban pa nga kompanya; wala sang permanente nga pangitan-an; kag wala sang regular nga suporta halin sa pamilya.
“[While] receiving assistance under the Sustainable Livelihood Program is based on a set of eligibility criteria to be followed, specifically, they should be based on the Listahanan database of poor households or those found qualified through administration of SLP Means Test,” dugang pa sang DSWD-6.
Samtang, sang damlag lang, nagpahanumdom man ang DSWD central office sa sa mga opisyal nga indi paglaktan sang politika ang ila relief operations kung sa diin ang relief packs indi dapat nga paggamiton sang local officials nga magapadalagan sa masunod nga eleksyon.
“Bawal pangalan at pictures as long as released by DSWD,” suno kay DSWD Strategic Communications OIC Lara Duran. (AAL/JNH/PIA Iloilo)
