SYUDAD SANG ILOILO (PIA) — Gina-target sang Department of Social Welfare and Development (DSWD) 6, pinaagi sa Walang Gutom Program (WGP), sa paghatag sang P42.57 million nga kantidad sang food credits sa mga household beneficiaries sa probinsya sang Antique kag Iloilo bilang kabahin sang Period 12 Food Redemption activities subong nga bulan.
Sa report sang DSWD 6, ang mga household beneficiaries gikan sa 42 ka kabanwahanan sa probinsya sang Iloilo lakip ang syudad sang Iloilo kag Passi kag 17 ka kabanwahanan sa probinsya sang Antique ang makabenepisyo sa P42,579,000 food credit.
Kada household beneficiary, suno sa DSWD 6, makabaton sang food assistance nga nagakantidad sang P3,000 nga igapaagi sa ila Electronic Benefit Transfer (EBT) card.
Mahibaluan nga ang Walang Gutom Program gindesinyo agod hga malambot ang 43,021 ka mga target household beneficiaries sa Kabisayaan Nakatungdan, nga ang inisyal nga implementasyon nakasentro sa probinsya sang Negros Occidental. Apang, ginpalapad ang programa sa paglakip sa mga provinsya sang Antique kag Iloilo.
Sandig sa datos sang DSWD, sa karon, kapin 10,406 ka mga household beneficiaries sa Iloilo kag 3,787 sa Antique ang na-validate nan ga makabaton sang food credit.
Dugang pa, padayon man ang ginapatigayon nga mga simultaneous pre-redemption activities sang WGP Regional Program Management Office kon sa diin ginalakipan ini sang mga orientation session para sa mga local government units (LGUs) kag retailers, pagpinalisar sang mga schedule, kag pag-accredit sang mga retailer agod nga masiguro ang epektibo kag madinalag-on nga implementasyon sang programa.
Isa ang Walang Gutom Program sa mga flagship iniative sang gobyerno nga nagatuyo nga masabata ang kagutom sa mahuyang nga mga pamilya sa bug-os nga pungsod. (AAL/FRG/PIA6/lakipan sang report gikan sa DSWD6)
