TAGBILARAN CITY, Bohol (PIA) — Nipahibalo ang Department of Social Welfare and Development (DSWD) Rehiyon 7 nga wala sila nagpahigayon og registration o validation karong panahona sa matag barangay dinhi sa Central Visayas kalabot sa “Walang Gutom Program.”
Matud pa sa DSWD-7, kun adunay nanglista ug nangayo og kwarta sa mga nagpalista sa Walang Gutom Program, dili kini ilaha.
Kalabot niini, gi-awhag sa buhatan ang publiko nga dili magpailad ug i-report dayon sa
DSWD pinaagi sa telephone number (032) 412 9908 / (032) 232 9507 ug email address
[email protected].
Ang Walang Gutom Program mao ang flagship program sa nasudnong kagamhanan nga nagtumong sa pagsulbad sa involuntary nga kagutom ug malnutrisyon nga nasinati sa mga pamilya tungod sa ubos nga kita.
Sa iyang State of the Nation Address (SONA) niadtong Hulyo 22, si Presidente Ferdinand R. Marcos Jr. nipasiugda sa panginahanglan nga mamuhonan sa inklusibo nga kalamboan sa katawhang Pilipino, nga naglakip sa pagkaon ug nutrisyon ubos sa “Walang Gutom 2027: Food Stamp Program.”
Si Marcos mipahayag nga ang bag-o lang gilusad nga “Walang Gutom 2027” hingpit nang ilusad gikan sa inisyal nga 2,300 ka mga panimalay, karon ngadto na sa 300,000 ka kabus nga mga panimalay sa tibuok nasud sa katapusan niining tuiga.
Matud pa niini nga ang programa magpadayon hangtod nga mapakaon sa gobyerno ang usa ka milyon nga labing kabus nga pamilya sa 2027. (ECB/PIA7-Bohol)
