LARENA, Siquijor (PIA) — May tabang pinansyal ang kagamhanan sa nga banay nga mikita lamang og minimum o ubsa pa.
Kini ang Ayuda sa Kapos ang Kita Program (AKAP) nga ipaagi sa Department of Social Welfare and Development (DSWD), saysay ni Social welfare and development officer and team leader Divine Grace R. Lescias, atol sa gihimong Second Quarter Provincial Convergence Meeting niadtong Hunyo 25.
Gawas sa mga minimum-wage earners, lakip sa mga kwalipikadong benepisyaryo ang mga indibidwal nga naapektuhan sa taas nga inflation ug kadtong mas gamay sa minimum ang kita, partikular dinhi sa probinsiya sa Siquijor.
Dinhi, ang bag-ong minimum nga suholan alang sa mga non-agricultural nga establisemento gitakda lamang sa P420, ug P415 alang sa mga establisemento sa agrikultura ug dili pang-agrikultura.
Gipasabot ni Lescias nga aron mahimong kuwalipikado alang sa programa sa AKAP, ang mga benepisyaryo kinahanglan adunay trabaho apan gamay ra ang kita.
“Dapat naay trabaho pero gamay ang income unya sa usa ka panimalay at least duha ang makaapil,” matud pa niya.
Hinuon, gidugang ni Lescias nga target sa programa ang mga benepisyaryo nga dili apil sa ubang dagkong social assistance programs sama sa 4Ps, Senior Citizen Social Pension, ug kadtong naka-avail na sa Assistance to Individuals in Crises Situation (AICS).
“Ang pwede maka avail mao kadtong mga benepisyaryo nga dili apil, wala makaapil sa 4Ps, Senior Citizen Social Pension ug katong nakaapil sa AICS,” dugang pa niya.
Ang AKAP nagtanyag og lain-laing matang sa tabang: P1,000 ngadto sa P150,000 alang sa medikal ; P5,000 ngadto sa P100,000 para sa lubong ; P10,000 alang sa nabiktima sa katalagman; P2,000 ngadto sa P10,000 alang sa pagkaon, ug P2,000- 10,000 alang sa cash relief.
Matud ni Lescias, gikinahanglan ang pruweba sa kita, nga adunay mga piho nga dokumento nga gikinahanglan para sa pormal ug dili pormal nga ekonomiya.
“Sa mga indibiduwal nga sakop o naapil, pwedeng moattest ang barangay captain or association president nga gamay ra ang income sa pamilya,” matud pa niya.
Dugang pa ni Lescias, nga kinahanglan isumiter ang labing daghan nga 3,000 ka mga indibidwal labing menos 14 ka adlaw sa trabaho sa wala pa ang gitakdang petsa sa “payout.” (CAG/PIA7 Siquijor)
