Photo: PIA NCR
BACOLOD CITY (PIA) — Ang Department of Social Welfare and Development (DSWD) kag United Nations Development Program (UNDP) nagpirma sang isa ka Memorandum of Agreement (MOA) nga nagatuyo pasanyugon ang social protection services sa pungsod. Ini ginpatigayon sang Nobyembre 15 sa DSWD Central Office.
Sa idalum sang kasugtanan, pabaskugon sang DSWD kag UNDP ang ila kolaborasyon sa mga aspeto sang digitalization, monitoring, kag evaluation sang social programs. Ginpa-athag ni DSWD Secretary Rex Gatchalian ang importansya sang sini nga kolaborasyon sa pagpabaskog sang mga inisyatibo para sa mga imol kag sektor nga nagakinahanglan sang bulig.
Sa iya nga mensahe, nagpasalamat si Gatchalian sa mga oportunidad gikan sa nagkalainlain nga mga organisasyon pareho sang UNDP bangud ini nagapahanugot sa ila ahensya nga maka-ubra kaupod sang mga eksperto.
Dugang hambal ni Gatchalian nga ang ini nga inisyatibo sa tunga sang DSWD kag UNDP tinutuyo nga magpatuman sang makabag-o nga mga paagi sa pagpasangkad sang social protection sang mga Pilipino.
Ang duha ka mga ahensya nagaplano nga makig-angot sa nagkalainlain nga mga stakeholders agud mapauswag ang digitalisasyon sang ila mga programa.
Dugang pa, magabuligay sila sa teknikal nga aspeto sang pagdumala sang datos agud mapaayo ang kapasidad sang DSWD sa pag-monitor kag pag-evaluate sang ila mga programa.
Sa bahin ni UNDP resident representative Dr. Selva Ramachandran, ginpabutyag niya ang pagsalig sa potensyal sang sini nga kolaborasyon, ilabi na sa pagpahagan-hagan sang kapigaduhon.
Suno kay Ramachandran, paagi sa paggamit sang digital tools kag maayo nga mga pamaagi sa pag-evaluate, masiguro ang epektibo nga pag-implementar sang mga social protection kag development programs. (AGP/BPS/PIA NCR/PIA Negros Occidental)
