SYUDAD SANG ILOILO (PIA) — Natalana ang Department of Social Welfare and Development (DSWD) mag-hire sang masobra sa 1,200 ka mga intern para sa iya central kag field offices agud hatagan sila sang bulig pinanasyal kag eksperyensya sa trabaho, suno sa Malakanyang sang Miyerkules.
Ini ang may kaangtanan man sa padayon nga pagduso ni President Ferdinand R. Marcos Jr. nga mapaayo pa ang youth engagement kag suporta sa edukasyon.
Ginpalayag sang DSWD nga kabilugan nga 1,235 ka mga intern ang pagakuhaon, ang 75 ka slots ang gin-alokar para sa tagsa ka 16 ka Field Offices (FO) kag ang 35 slots para sa central office sa Batasan Road, Quezon City.
“May pagkakataon po kayong sumali sa Government Internship Program (GIP) ng Department of Social Welfare and Development,” siling ni Presidential Communications Undersecretary and Palace Press Officer Claire Castro sa tion sang briefing sa Malakanyang.
Bukas ang GIP application sa mga estudyante sa kolehiyo nagapangidaron 18-25, mas ginapasulabi ang mga incoming 3rd and 4th-year nga mga estudyante sa palaabuton nga school year.
Ang bulanan nga kita sang pamilya sang aplikante ang indi magsobra sa pinakaulihi nga regional poverty threshold sang Philippine Statistics Authority.
Suno kay Castro ang tagsa ka indibidwal nga napilian para sa GIP magabaton sang stipend kabaylo sa 30 working days sang serbisyo.
Ginpahayag sang DSWD nga ang GIP isa ka component sang Kabataan 2000 program nga ginsugdan sang gobyerno. Ini nga programa nagatanyag sang hands-on experience samtang nagatrabaho sa nanarisari nga ahensya sang gobyerno.
Yadtong mga ginpahamtang sa FOs pagasuportahan ang operasyon sang DSWD regional units.
Humalin 2017 tubtub 2024, malapit sa 8,000 ka mga estudyante sa kolehiyo ang nakabenepisyo nagikan sa inisyatibo nga naghatag sa ila sang practical exposure kag mas madalum nga paghangop sa serbisyo publiko, pahayag sang DSWD. (AAL/LAF/PIA Iloilo/PND)
