TAGBILARAN CITY, Bohol (PIA) — Mingpasidaan ang Department of Social Welfare and Development (DSWD) ngadto sa tanang benepisyaryo sa Pantawid Pamilyang Pilipino Program (4Ps) batok sa peke nga post sa Facebook nga nikatap online kabahin sa schedule sa grant payout.
Atol sa gipahigayong Information Officer’s Conference sa lalawigan sa Bohol niadtong Hunyo 18, si 4Ps Program Information Officer Kerwin Macopia miingon nga nakadawat og mga taho ang ilang buhatan kalabot sa usa ka viral post nga nagbutang og opisyal nga mga petsa ingon man ang mga ngalan sa gituohang nakadawat sa 4Ps grants.
Matud pa ni Macopia nga ang City/Municipal Links (C/MLs), inabagan sa Parent Leaders (PLs), direktang naghatag sa payout schedules sa 4Ps sa mga benepisyaryo sa ilang tagsa-tagsa ka lugar.
Gawas niini, ang tanang opisyal nga anunsyo, lakip na ang payout schedules alang sa 4Ps program, gipakatap usab pinaagi sa official page sa 4Ps: (https://www.facebook.com/DSWDPantawidPamilya).
Dugang pa, ang Landbank of the Philippines (LBP) otorisado usab sa pag-anunsyo sa mga iskedyul sa payroll pinaagi sa opisyal nga Facebook page niini sa higayon nga ma-kredito na ang cash grants sa mga bank account sa mga benepisyaryo.
Agig pagsunod usab sa Data Privacy Act of 2012, ang DSWD nagsiguro nga ang mga detalye sa benepisyaryo dili ma-post sa publiko.
Gisubli sa 4Ps Program Information Officer nga ang DSWD nag-awhag sa tanang benepisyaryo sa 4Ps nga magsalig lamang sa mga opisyal nga tinubdan alang sa tukmang impormasyon ug aron malikayan ang kalibog. (ECB/PIA7-Bohol)
