TAGBILARAN CITY, Bohol (PIA) — Nipahigayon og local chief executives consultation dialogue ang Department of Social Welfare and Development (DSWD) Rehiyon 7 alang sa Pantawid Pamilyang Pilipino Program (4Ps) sa Bohol niadtong Hulyo 5 aron pagpalig-on sa pakigtambayayongay sa local government units (LGUs).
“This will be part of the Pantawid history in strengthening partnership with LGUs as our primary partners in implementing the Pantawid program towards eradicating poverty in the country.
Kini mahimong kabahin sa kasaysayan sa Pantawid sa pagpalig-on sa pakigtambayayong sa mga LGUs isip atong nag-unang kaabag sa pagpatuman sa Pantawid nga programa padulong sa pagwagtang sa kakabos sa nasud),” matud pa ni 4Ps national program manager Dir. Gemma Gabuya sa iyang keynote speech.
Matud pa niini nga ang dayalogo sa Bohol makasaysayanon tungod kay kini ang unang LGU nga dayalogo sa lalawigan.
Kini ang ikaduha sa lebel sa rehiyon ug ang una sa nasyonal nga lebel.
Gisubli ni Gabuya nga ang programa dili usa ka dole-out kon dili usa ka komplementaryong serbisyo, pagpamuhunan sa human capital ug paghatag og conditional cash nga tabang aron masuportahan ang edukasyon, panglawas ug nutritional nga panginahanglan sa mga bata uban sa suporta sa LGUs.
Gihatagan ug gibug-aton ni Gabuya ang mga nahimo ug naangkon sa programa sa miaging 15 ka tuig nga pagpatuman niini.
Sa Bohol, adunay 63,988 ka aktibong benepisyaryo ug 178,894 ka mga bata ang gimonitor, kabahin sa 428,699 ka panimalay sa Central Visayas.
Sa human capital investment, ang programa nakatabang sa 11.4 milyones ka mga bata nga makagradwar sa elementarya sukad niadtong 2010.
Adunay kinatibuk-ang 3.2 milyon nga mga bata ang nakatapos sa high school ug 32,556 sa kolehiyo, samtang 6,394 ang nakapasar sa board exams diin 49 niini ang nag-una sa ranggo sa top ten mga board exams, base sa datos.
Ang programa nagpatunghag Latin nga pasidungog; 82 ka magna cum laude, 1,135 ka cum laude ug 132 nga adunay espesyal nga mga kalainan.
Sa Bohol, niabot na sa 28,561 ang ni-exit sa programa tungod sa self-sufficient household nga gi-transition ug na-endorso sa LGU ug wala nay anak nga 0-18 anyos.
Sa lebel sa kaayohan sa mga benepisyaryo, 12,665 ang self-sufficient, 43,641 sa panginabuhi, ug 7 sa survival.
Mokabat sa 15,222 ka mga bata ang migradwar sa elementarya, 13,409 sa high school, ug 10,027 sa kolehiyo, pinaagi sa programa.
Nakakuha usab kini og 96 ka mga magtutudlo, 495 ka Pantawid board passers ug 1,187 ka exemplary Pantawid graduates.
Adunay 72,571 ka mga panimalay ang gihatagan og conditional cash transfer.
Ang gigahin alang sa 4Ps sa probinsiya mikabat sa P1.4 bilyones, diin P488.75 milyones alang sa edukasyon, P498.02 milyones alang sa panglawas, ug P414.45 milyones alang sa rice allowance.
Ang mga LGUs nagpakita og suporta pinaagi sa 36 ka gipagawas nga executive order, 33 ka municipal ordinance ug 24 ka resolusyon. (ECB/PIA7-Bohol)
